Izraıl Gaza turǵyndaryn kúshtep kóshirýdi josparlap otyrǵan joq
ASTANA. KAZINFORM — Izraıl úkimetinde Gaza sektorynyń turǵyndaryn basqa jerge kóshirý máselesi áli de qyzý talqylanyp jatyr, dep habarlaıdy Kazinform agenttiginiń menshikti tilshisi.
Izraıl Gaza sektoryndaǵy palestınalyqtardy kúshtep qonys aýdartýdy nemese elden shyǵarýdy josparlap otyrǵan joq. Bul týraly sársenbi kúni eldiń syrtqy ister mınıstri Gıdeon Saar Lıýblıanada ótken baspasóz máslıhatynda málimdedi, dep jazdy The Times of Israel.
— Biz Gaza sektorynan eshkimdi kúshtep qýdalaýdy da, deportatsııalaýdy da kózdep otyrǵanymyz joq, — dedi Izraıldiń syrtqy ister mınıstri.
Onyń aıtýynsha, basqa bir el palestınalyqtardy qabyldaýǵa kelisse, Izraıl anklavtan óz erkimen ketkisi keletin turǵyndardyń shyǵýyna kedergi keltirmeıdi.
— Alaıda eshkimdi erkinen tys áreket etýge májbúrlemeımiz, — dedi Saar.
Mınıstr Slovenııaǵa Izraıldiń Lıýblıanadaǵy elshiliginiń ashylý rásimine qatysý úshin barǵan.
Onyń bul málimdemesi Izraıl úkimetiniń birneshe múshesi Gaza sektoryndaǵy palestınalyqtardy jappaı qonys aýdartý máselesin qaıta kótergennen keıin jasaldy.
Izraıldiń Qorǵanys mınıstri Israel Kats 2 qyrkúıekte Gaza sektory turǵyndaryn jappaı qonys aýdarýǵa yntalandyrý jónindegi jospardyń áli de talqylanyp jatqanyn málimdedi. Onyń aıtýynsha, AQSh prezıdenti Donald Tramp bastamany ýaqytsha toqtatqanymen, másele túbegeıli jabylǵan joq.
— Turǵyndar qonys aýdarmaıynsha, Gaza máselesin túbegeıli sheshýdiń naqty joly joq, — dedi Kats ótken aptada.
Izraıldiń Ulttyq qaýipsizdik mınıstri Itamar Ben-Gvır 3 qyrkúıekte Gaza sektory turǵyndarynyń qonys aýdarýyna arnalǵan jeti jyldyq jospardy tanystyrdy. Mınıstr bul bastamany «erikti emıgratsııa» dep atady.
AQSh-tyń Izraıldegi elshisi Maık Hakabı buǵan deıin Izraıl bıligi palestınalyqtardy Gaza sektorynan kúshtep kóshirýdi kózdep otyrǵan joq dep málimdegen.
Buǵan deıin 8 memleket Izraıldi Tramptyń Gaza jónindegi josparyn oryndamaǵany úshin aıyptaǵanyn jazǵan edik.
Aqzat Jıenalına
