Izraıl Gaza sektoryn bombalaýdy toqtatty
ASTANA. 22 qarasha. QazAqparat - Izraıl qarýly kúshteri (TsAHAL) 21 qarasha kúngi saǵat 21.00-den (jergilikti ýaqyt boıynsha) bastap Gaza sektoryndaǵy áskerı is-qımyldardy toqtatatyndyǵy týraly málim etti.
Bul týraly armııa ókiline silteme jasap Reseı Jańalyqtar agenttigi habarlady.
Osylaısha, TsAHAL palestına jaýyngerlerimen bolǵan bir apta boıǵy soqqylarmen almasýlardan keıin memleket basshylyǵynyń bitimge kelý týraly sheshimin oryndaýda.
Bitimge kelý týraly jańalyq Gazanyń kóshelerine ondaǵan myń adamnyń shyǵýyna sebep boldy. Kóptegen shyǵyndarǵa qaramastan, palestınalyqtar ózderiniń jeńisine senimdi. Adamdar ózderiniń qýanyshtaryn kókke oq atý, bıleý, kólikterden dybys berý arqyly bildirýde. «Palestına halqy jeńdi. Biz kelisim jasaı otyryp jeńiske jettik, sebebi, onyń talaptary - bizdiń jaqta», dep jetkizdi óziniń qýanyshty sezimderin jas turǵyn Muhammed.
Bitimge kelý týraly kelisimdi BUU Bas hatshysy Pan Gı Mýn, sondaı-aq Eýropalyq keńes pen Eýrokomıssııanyń tóraǵalary Herman van Rompeı men Joze Manýel Barrozý qoldady.
Izraıl men HAMAS qozǵalysy sarbazdarynyń Gaza sektoryndaǵy qarsylyqtary ızraıldik armııa «Oblachnyı stolp» operatsııasyn bastaǵan 14 qarasha kúnnen bastap jalǵasty. Izraıl jerden, áýeden jáne teńizden qashyqtyqtan jibergen soqqylarymen palestına aýmaǵyndaǵy júzdegen «terrorıstik belsendi nysandy» shabýyldady. Bombalaýlar Gaza sektorynyń 160-qa jýyq turǵynynyń ómirin qıdy. Palestınalyqtardyń jaýapty soqqylarynyń saldarynan bes ızraıldik azamat mert boldy.
Tel-Avıv tórt jyl ishinde birinshi ret óz armııasyna 75 myń soldat-rezervısti tartýǵa ruqsat berip, anklavqa qurlyqtyq áskerdi engizýge daıyn boldy. Degenmen, jer ústimen basyp kirý bolmady. Izraıl qorǵanys mınıstri Ehýd Barak palestınalyqtar bitimgerlik kelisimin buzǵan jaǵdaıda, ızraıl armııasy budan da zor kúshterdi qoldanýǵa daıyn ekendigin eskertti.
