Izraıl Gaza sektorynyń soltústigine áýeden shabýyl jasady
ASTANA. KAZINFORM — 10 qazanda atysty toqtatý kelisimine qaramastan Izraıl áskeri Gaza sektorynyń soltústigindegi Djabalııa aımaǵyna áýeden soqqy berdi, dep habarlaıdy Kazinform Anadolu agenttigine silteme jasap.
Qaýipti jaǵdaıǵa baılanysty qutqarý qyzmeti oqıǵa ornyna birden jete almady.
Palestınanyń resmı aqparat agenttigi WAFA-nyń habarlaýynsha, Izraıl áskerı ushaqtarynyń Jabalııa bosqyndar lagerine jasaǵan shabýylynan eki palestınalyq qaza taýyp, birneshe adam jaralanǵan.
Shabýyl Gazadaǵy shıelenistiń atysty toqtatýdan keıin de jalǵasyp jatqanyn kórsetedi. Djabalııa aımaǵy Izraıl «sary syzyq» dep belgilegen áskerı aımaqtarǵa jaqyn ornalasqan.
Búgin tańerteń Izraıl armııasy Gaza sektorynyń ońtústigindegi Rafah qalasyna áýeden soqqy berdi.
Aqparat kózderiniń habarlaýynsha, Izraıl premer-mınıstri Bınıamın Netanıahý men Qorǵanys mınıstri Israel Katts Bas shtab basshysy Eııal Zamır jáne onyń shtabymen birge jaǵdaıǵa ortaq baǵa beredi.
10 qazandaǵy atysty toqtatý kelisimi boıynsha Izraıl áskerleri Gaza ishindegi «sary syzyq» dep belgilengen aımaqtardan ketýi kerek edi.