Izraıl Gaza sektorynyń ortalyǵynda alǵashqy qurlyq operatsııasyn bastady

ASTANA. KAZINFORM – Izraıl áskeri Gaza sektorynyń ortalyǵyndaǵy Deır el-Balah qalasynda alǵashqy qurlyq operatsııasyn bastady. Bul kepilge alynǵandardyń otbasylarynyń alańdaýshylyǵyn týdyrdy, olar jaqyndarynyń sol jerde bolýy múmkin ekenin joqqa shyǵarmaıdy, dep habarlaıdy Euronews.

TsAHAL Gaza sektorynyń ortalyǵyn evakýatsııalaýǵa buıryq bergen kúnniń erteńine Izraıl tankteri Deır el-Balahqa kirdi.

Baqylaýshylardyń atap ótýinshe, Deır-el-Balah Izraıl men HAMAS arasynda 21 aıǵa sozylǵan soǵys kezinde jerústi operatsııalary is júzinde ótkizilmegen Gaza ortalyǵyndaǵy sanaýly aımaqtardyń biri bolyp qalǵan. Qala Gazanyń ońtústiginen qonys aýdarǵan myńdaǵan palestınalyqtardy qabyldap otyr, sondaı-aq ol ortalyq ornalasýyna baılanysty turaqsyz kómek jetkizýdiń negizgi ortalyǵy.

Izraıl qorǵanys armııasy sońǵy operatsııanyń maqsattary týraly ázirge málimdeme jasaǵan joq, biraq ızraıldik derekkózderdiń habarlaýynsha, TsAHAL-dyń osy ýaqytqa deıin Deır-el-Balahtan alystaý sebepteriniń biri HAMAS sol jerde kepilge alynǵan adamdardy ustaýy múmkin degen kúdikpen baılanysty. Sodyrlar Gazada 50 adamdy tutqynda ustap otyr, olardyń kem degende 20-sy áli tiri sanalady.

Gaza densaýlyq saqtaý mınıstrliginiń ókilderi dúısenbi kúni Izraıldiń sońǵy 24 saǵatta jasaǵan soqqylarynan kem degende 13 adamnyń, onyń ishinde eki áıel men bes balanyń qaza tapqanyn habarlady.

Habarlanǵandaı, dúısenbide ızraıldik áskerıler gýmanıtarlyq aımaq dep jarııalaǵan ýaqytsha shatyrly lager – Mývası aýdanyna da soqqy jasalǵan.

Osy arada Frantsııa, Birikken Koroldik, Kanada jáne Japonııa sııaqty 25 eldiń syrtqy ister mınıstrleri birlesken málimdemede qaqtyǵysty «tez arada» toqtatýǵa shaqyryp, «qabyldanbaıtyn» gýmanıtarlyq jaǵdaıdy aıyptady.

- BUU málimetinshe, 875 palestınalyqtyń kómek alýǵa árekettený kezinde qaza tapqany qorqynyshty, - delingen olardyń málimdemesinde.

Qol qoıǵan taraptar sondaı-aq AQSh pen Izraıl qoldaıtyn Gaza gýmanıtarlyq qoryna (GHF) silteme jasaı otyryp, «Izraıl úkimeti qurǵan kómek úlestirý modeli qaýipti, turaqsyzdyqty órshitedi jáne gazalyqtardy adamdyq qadir-qasıetinen aıyrady» dep sanaıdy.

Aıta keteıik, Iordanııa Gaza sektorynan 35 naýqas balany evakýatsııalady.