Izraıl Gaza sektoryndaǵy urysty keńeıtip jatyr

ASTANA. KAZINFORM – Izraıl Qorǵanys mınıstrligi aldaǵy kúnderi Gaza sektorynyń «kóptegen aýdandarynda» urys qımyldary kúsheıetinin málimdedi. Bul týraly Euronews habarlady.

TsAHAL (Izraıl qorǵanys armııasy) juma kúni tańerteń palestınalyqtarǵa Shýdjaııa, Týrkman, Zaıtýn jáne Týffa aýdandaryn shuǵyl túrde tastap shyǵýǵa buıryq berdi. Kelesi kúni mınıstrlik urystardyń aýqymy keńeıip, búkil sektordyń basym bóligine taralatynyn málimdedi.

— Qazir – HAMAS-qa qarsy kóterilip, barlyq ızraıldik tutqyndardy bosatyp, soǵysty toqtatýdyń jalǵyz jolyna qadam jasaý ýaqyty, – dedi Izraıldiń qorǵanys mınıstri Israel Kats palestınalyqtarǵa úndeý jasap.

Eske salsaq, 18 naýryzda Izraıl eki aıǵa sozylǵan HAMAS-pen aradaǵy ýaqytsha bitimniń buzylǵanyn jarııalap, áskerı operatsııany qaıta bastady. Aldymen áýe shabýyldary jasalyp, artynsha qurlyqtaǵy áskerı is-qımyldar jalǵasty. Izraıl tarapynyń aıtýynsha, bul sharalar HAMAS-ty tutqyndardy bosatýǵa májbúrleý jáne sektordyń soltústigi men ońtústigi arasynda býferlik aımaq qurý maqsatynda qolǵa alynǵan.

BUU-nyń málimetinshe, sońǵy úsh aptada Gaza sektorynda 400 myńǵa jýyq palestınalyq qonys aýdarýǵa májbúr bolǵan. Kóptegen turǵyndar tańdaý aldynda qaldy: óz úılerin tastap, basqa jaqqa ketý nemese qaýip-qaterge qaramastan, sonda qalý.

Gýmanıtarlyq jaǵdaıdyń ýshyǵýy men urys qımyldarynyń kúsheıýi halyqaralyq qaýymdastyqtyń alańdaýshylyǵyn týdyrýda.