Izraıl Gaza sektoryndaǵy Rafahtyń taǵy birneshe aýdanyn evakýatsııalaıdy
ASTANA. KAZINFORM – Izraıl áskeri Rafahtaǵy taǵy birneshe aýdan turǵyndarynan qaladan ketýdi talap etti. Turǵyndardy tez arada Jerorta teńizi jaǵalaýyndaǵy Ál-Marvazı lagerine evakýatsııalaý tapsyryldy, dep jazady DW.
Izraıl armııasy 5 mamyr, senbi kúni Palestınanyń Rafah qalasynyń turǵyndaryn qalanyń shyǵys bóligindegi birneshe aýmaqty tastap ketýge shaqyrdy. Izraıl áskerıleri X áleýmettik jelisi jáne SMS arqyly taratqan arab tilindegi habarlamada bosatylýy kerek naqty aımaqtar, sonyń ishinde eki bosqyn lageri ataldy.
Turǵyndardy tez arada Jerorta teńizi jaǵalaýyndaǵy Ál-Mazarı lagerine kóshirý buıyryldy. Baqylaýshylardyń aıtýynsha, bul Izraıl armııasynyń Rafahtaǵy palestınalyq HAMAS radıkaldy qozǵalysy sodyrlaryna qarsy áskerı operatsııalaryn keńeıtýge daıyndalyp jatqanyn bildiredi.
Izraıldiń Rafahtaǵy áskerı operatsııasy kóptegen elderdiń teris reaktsııasyn týǵyzdy. AQSh prezıdenti Djo Baıden eger bul qalada aýqymdy áskerı operatsııa bastalsa, Amerıkanyń Izraılge áskerı kómegi toqtatylatynyn málimdedi.
BUU-nyń habarlaýynsha, Mysyr shekarasyndaǵy Rafahta Gaza sektorynyń basqa aımaqtaryndaǵy soǵystan qashqan mıllıonnan astam beıbit turǵyndar pana tapty jáne aýqymdy áskerı operatsııa olardyń ómirine qaýip tóndiredi.
