Izraıl Gaza sektoryndaǵy kópqabatty ǵımaratty qıratty
ASTANA. KAZINFORM — Qaladaǵy halyq eń tyǵyz ornalasqan aýdandardyń birinde ornalasqan kópqabatty ǵımaratqa jasalǵan shabýyl beıbit turǵyndar arasynda alańdaýshylyqty kúsheıdi, dep jazdy Kazinform agenttiginiń menshikti tilshisi.
Izraıl armııasy Gaza qalasyndaǵy 12 qabatty «Al-Mýshtaha» munarasyna áýe soqqysyn jasaǵanyn málimdep, HAMAS qozǵalysyn kópqabatty ǵımarattardy áskerı maqsatta paıdalanýda aıyptady.
ضمن حرب الإبادة وسياسة الأرض المحروقة و هدم الأبراج و تفريغ غزة من سكانها جيش الاحتلال الاسرائيلي يواصل جرائمه و يقصف برج المشتهي في غزة في غارة جوية pic.twitter.com/lJqtRNAMUK
— A Mansour أحمد منصور (@amansouraja) September 5, 2025
Izraıl Qorǵanys armııasynyń (TsAHAL) ókili Avıchaı Adraı aldaǵy kúnderi basqarý ortalyqtary, mergender pozıtsııasy jáne zymyran ushyrý oryndary retinde qoldanylatyn basqa da ǵımarattarǵa soqqy jasalatynyn habarlady.
— HAMAS-tyń áskerı doktrınasyna sáıkes, mundaı ǵımarattar baqylaý, úılestirý jáne tosqaýyldar uıymdastyrý úshin qoldanylady, — dedi ol.
Izraıl áskerı málimdemesine sáıkes, ǵımarattyń astynda ornalasqan jerasty keńistigi HAMAS tarapynan shabýyldardy josparlaý, TsAHAL kúshterine tosqaýyldar qurý jáne jaýyngerlerdiń sheginý joldaryn qamtamasyz etý úshin qoldanylǵan.
Alaıda «Al-Mýshtaha» ǵımaratynyń ákimshiligi bul málimdemelerdi teriske shyǵaryp, ǵımarat tek baspana izdegen bosqyndar úshin paıdalanylǵanyn málimdedi.
Kýágerlerdiń aıtýynsha, májbúrli evakýatsııa týraly eskertý berilgennen keıin nebári 15 mınýt ótkende, ǵımaratqa úsh márte áýe soqqysy jasalǵan.
Qara tútin búkil aýdandy jaýyp, munara mańyndaǵy shatyrly lagerlerge órtke oranyp, qırap qalǵan.
Al Jazeera habarlaýynsha, birneshe beıbit turǵyn jaraqat alyp, «Ash-Shıfa» aýrýhanasyna shuǵyl kómekke jetkizilgen.
Izraıl áskeri:
— Shabýyl aldynda beıbit turǵyndardy eskertý sharalary jasaldy, biraq halyq tyǵyz ornalasqan jaǵdaı men qaýipsiz baspanalardyń joqtyǵy mundaı soqqylardyń beıbit turǵyndarǵa qaýip tóndirýine ákeledi, — dep málimdedi.
Izraıldiń qorǵanys mınıstri Israel Kats buǵan deıin:
— Gazada tozaqtyń qaqpasy ashyldy — dep, armııa HAMAS qarýsyzdandyrylyp, barlyq ızraıldik tutqyndar bosatylǵanǵa deıin operatsııany jalǵastyratynyn aıtqan bolatyn.
Gaza sektorynyń Densaýlyq saqtaý mınıstrligi sońǵy 24 saǵat ishinde Izraıl shabýyldarynan kem degende 69 adam qaza taýyp, 422 adam jaralanǵanyn habarlady.
2023 jylǵy 7 qazanda bastalǵan soǵystan beri qaza tapqandar sany 64 myńnan, jaralanǵandar sany 162 005 adamnan asty.
Qala turǵyndary kelesi soqqylardyń bıik ǵımarattarǵa jasalýy múmkin ekenin aıtyp alańdaýly. Gaza qalasynda mundaı ǵımarattar júzdep sanalady, al olardyń kópshiligi baspanasynan aıyrylǵan otbasylar úshin jalǵyz pana bolyp otyr.
Buǵan deıin Gaza sektorynda tumaýdyń aýyr túri taralyp jatqany habarlanǵan edi.