Izraıl Gaza sektorynda ustalǵan 12 palestındikti bosatty
ASTANA. KAZINFORM — Izraıl Gazada ustalǵan, arasynda eki áıel bar, 12 palestındikti bosatty. Bul týraly Anadoly habarlady.
Kýágerlerdiń aıtýynsha, Halyqaralyq Qyzyl Krest komıtetine tıesili avtobýs bosatylǵandardy Gaza sektory aýmaǵyna jetkizgen.
HAMAS qozǵalysyna baılanysty Tutqyndar jónindegi aqparat bıýrosynyń málimetine sáıkes, bosatylǵan 12 adam Gaza sektorynyń ortalyǵynda ornalasqan Deır-el-Balah qalasyndaǵy «Ál-Aqsa sheıitteri» aýrýhanasyna jetkizilgen.
Izraıl áskeri tutqyndardyń Halyqaralyq Qyzyl Krestke qaı jerde tapsyrylǵany jáne olardyń densaýlyq jaǵdaıy týraly aqparat bergen joq.
2023 jyldyń 7 qazanynda Gazadaǵy qaqtyǵystar bastalǵaly beri Izraıl keı kezderi ustalǵan palestındikterdi bosatyp keledi. 2023 jyldyń sáýirinde Palestınalyq tutqyndar qoǵamy Izraıl myńdaǵan palestındikti óte aýyr jaǵdaıda ustap otyrǵanyn, bul áreketter olardyń aıtýynsha, barynsha zııan keltirý maqsatynda jasalyp jatqanyn málimdegen bolatyn.
Aıta ketelik Gaza sektoryndaǵy ǵımarattardyń 90 paıyzdan astamy qıraǵan.