Izraıl Gaza sektorynda elektr qýatyn sóndirip, soǵysty qaıta bastaýy múmkin

ASTANA. KAZINFORM – Izraıl HAMAS-qa qysymdy kúsheıtý úshin palestınalyqtardy soltústik anklavtan kóshirip, elektr qýatyn sóndirip, bombylaýdy bastaýy yqtımal, dep habarlaıdy Kazinform agenttiginiń menshikti tilshisi.

Izraıl palestınalyq toptar ustap otyrǵan kepildiktegi adamdardy bosatýdy qamtamasyz etetin atysty toqtatý týraly kelisimniń birinshi kezeńin jalǵastyratyn jańa usynys jasatý úshin HAMAS-qa birte-birte qysym jasaı berýdi kózdep otyr. Bul týraly Izraıldiń Kan qoǵamdyq telearnasy habarlady.

Gaza sektoryna gýmanıtarlyq kómek jetkizý jeksenbi kúni toqtatyldy. Izraıl tarapynan jasalatyn qysym osy baǵyttaǵy sharalardyń qosymshasy bolmaq.

Buǵan jaýap retinde HAMAS kepildikke alynǵan qalǵan adamdardy tatýlasý týraly kelisimniń ekinshi kezeńinde bosatatynyn jetkizdi.

Palestınalyq HAMAS qozǵalysy Izraıldiń bul áreketin atysty toqtatý týraly kelisimge keri áserin tıgizetin las áreket ári áskerı qylmys dep baǵalady.

Telearnanyń habarlaýynsha, Izraıldiń barynsha qysym kórsetýge baǵyttalǵan jospary keıingi birneshe aptada daıyndalǵan. Oǵan sáıkes Gaza sektorynyń turǵyndary soltústikten ońtústikke qaraı qaıta kóshiriledi. Mundaı áreket soǵystyń basym bóliginde qaıtalanyp keldi. Keıinirek qajet bolsa elektr qýaty da sóndirilýi múmkin.

Sońǵy josparlanǵan sharalarǵa sáıkes, áskerı áreketter qaıta jandanady. Bul joly AQSh-tyń osyǵan deıingi ákimshiligi Izraılge jetkizip kelgen jáne qoldanylýyna shekteý qoıǵan aýyr bombalar men mıllıardtaǵan dollardyń qarýy men áskerı tehnıkalary qoldanylatyn bolady.

Bul rette Saýd Arabııasy, Mysyr, Iordanııa, Katar, Eýroodaq pen Islam yntymaqtastyq uıymy Gaza sektoryna gýmanıtarlyq kómek jetkizýdi toqtatý jónindegi sheshimdi aıyptaǵan bolatyn.

BUU men gýmanıtarlyq uıymdar Gazanyń beıbit turǵyndaryna orasan zor zııanyn tıgizetinin aıtyp, Izraıldi blokadany alyp tastaýǵa shaqyrdy.

Osyǵan deıin Izraıldiń Ramazan aıynda Gazaǵa kúsh qoldanbaýǵa keliskeni týraly jazdyq.