Izraıl Gaza sektorynda beıbit turǵyndarǵa shabýyldy kúsheıtti
ASTANA. KAZINFORM – Izraıl áskeri Gaza sektorynyń barlyq aýmaǵynda palestınalyq beıbit turǵyndarǵa qarsy shabýyldaryn kúsheıtip, azamattyq halyq pen ınfraqurylym nysandaryna júıeli túrde soqqy jasap jatyr. Bul týraly Palestına quqyq qorǵaý ortalyǵy (PCHR) málimdedi, dep habarlaıdy Anadolu.
Uıymnyń saıtynda jarııalanǵan málimdemede Izraıl áskeri turǵyn úılerge, qonys aýdarǵan palestınalyqtar turatyn shatyrlarǵa, ýaqytsha ornalastyrý ortalyqtaryna, beıbit turǵyndar kóp jınalatyn oryndarǵa jáne azamattyq kólikterge shabýyldaryn jalǵastyryp jatqany aıtylǵan.
PCHR málimetinshe, bul shabýyldar Gaza sektoryndaǵy qalypty ómir súrý jaǵdaılaryn joıýǵa baǵyttalǵan aýqymdy saıasattyń bir bóligi bolyp sanalady. Uıymnyń baǵalaýynsha, bul saıasat jappaı adam óltirý, keń kólemdi qıratý, asharshylyq qaýpin kúsheıtý jáne halyqty májbúrli túrde kóshirý arqyly júzege asyrylyp jatyr.
Málimdemede sondaı-aq PCHR qyzmetkerleri sońǵy kúnderi Gaza sektorynyń túrli aýdandarynda tirkegen kóptegen shabýyl týraly derekter keltirilgen.
Uıymnyń málimetine sáıkes, 30 shildede Han-ıÝnıstegi Ál-Mavası aýdanynda qonys aýdarǵan turǵyndar ornalasqan shatyrǵa jasalǵan soqqy saldarynan segiz jastaǵy Ratıl Mahmýd Mýsa Abdalla men onyń aǵasy Abdalla Naser Abdelfattah ál-Belavı qaza tapqan. Taǵy úsh bala aýyr jaraqat alǵan.
Gaza qalasynyń Rımal aýdanynda beıbit turǵyndar jınalǵan jerge jasalǵan shabýyldan 28 jastaǵy Ahmed Mýın Muhammed ál-Ankar qaza taýyp, kóptegen adam jaralanǵan.
Uıymnyń habarlaýynsha, Deır ál-Balah pen Gaza qalasynyń keıbir aýdandary boıynsha evakýatsııa týraly eskertý jarııalanǵannan keıin turǵyn úıler men meshitke soqqy jasalǵan. Sonyń saldarynan kóptegen ǵımarat pen azamattyq ınfraqurylym nysany búlingen.
Sonymen qatar Gaza qalasyndaǵy páterge, Nýseırat bosqyndar lagerindegi, Deır ál-Balahtaǵy, Djabalııadaǵy jáne Han-ıÝnıstegi beıbit turǵyndar ornalasqan jerlerge jasalǵan shabýyldardan qaza tapqandar men jaralanǵandar tirkelgen.
PCHR Izraıl áskeriniń turǵyn aýdandarǵa, úılerge, ýaqytsha ornalastyrý ortalyqtaryna jáne azamattyq kólikterge jasaǵan shabýyldary beıbit turǵyndar arasyndaǵy qurbandar sanyn kóbeıtýge baǵyttalǵan júıeli saıasattyń bir bóligi ekenin málimdedi.
Uıym halyqaralyq qaýymdastyqty Gaza sektoryndaǵy jaǵdaıǵa baılanysty shuǵyl sharalar qabyldaýǵa, beıbit turǵyndardy qorǵaýdy qamtamasyz etýge, jaýapty tulǵalardy jaýapkershilikke tartýǵa jáne BUU Halyqaralyq soty men Halyqaralyq qylmystyq sotynyń sheshimderiniń oryndalýyna qol jetkizýge shaqyrdy.
Aıta keteıik, Izraıldiń Gaza sektoryna jasaǵan kezekti soqqylarynan 7 palestınalyq qaza tapqanyn jazdyq.
