Izraıl Gaza sektorynda áýe soqqylarynan keıin atysty toqtatý rejımin qaıta engizdi
ASTANA. KAZINFORM – Palestına anklavyndaǵy ondaǵan nysanǵa túngi áýe soqqylarynan keıin Izraıl bıligi Gaza sektorynda atysty toqtatý rejımin qaıtadan engizgenin málimdedi.
Izraıl Qorǵanys armııasynyń (TsAHAL) dereginshe, operatsııa barysynda ondaǵan nysan, sonyń ishinde komandalyq pýnktter, qarý-jaraq qoımalary men tonnelder joıylǵan. Izraıl tarapynyń málimetinshe, shabýyldyń negizgi maqsaty 2023 jylǵy 7 qazandaǵy oqıǵalarǵa qatysy bar 30-dan astam HAMAS orta býyn komandırlerin joıý bolǵan.
– Ondaǵan terrorıstik nysandar men sodyrlarǵa soqqy berilgennen keıin TsAHAL atysty toqtatý rejımin qaıta qalpyna keltirýge kiristi. Izraıl kelisim sharttaryn qatań saqtaıdy jáne kez kelgen buzýshylyqqa qatań jaýap qaıtarady, – delingen armııanyń málimdemesinde.
Izraıl áskeri operatsııa HAMAS tarapynan atysty toqtatý týraly kelisimdi birneshe márte buzýyna, sonyń ishinde Gaza sektorynyń ońtústigindegi Rafah qalasynda ızraıldik áskerge jasalǵan snaıperlik shabýyl saldarynan bir sarbazdyń qaza tabýyna jaýap retinde jasalǵanyn habarlady.
Palestınanyń Densaýlyq saqtaý organdarynyń dereginshe, sońǵy áýe soqqylarynan qaza tapqandar sany 104 adamǵa jetti, onyń ishinde 46 bala bar. Taǵy 253 adam jaraqat alǵan.
HAMAS ókili Izraıldi «AQSh qoldaýymen jańa tártipti kúshpen ornatýǵa tyrysyp otyr» dep aıyptap, aralyq elderdi Tel-Avıvke qysym jasaýǵa shaqyrdy.
Izraıl Premer-mınıstri Bınıamın Netanıahý buǵan deıin HAMAS-tyń kelisimdi buzǵanyn aıtyp, Gaza sektoryna qýatty soqqylar berýdi tapsyrǵan. Óz kezeginde eldiń Qorǵanys mınıstri Israel Kats HAMAS basshylary qaı jerde bolsa da jaýapkershilikten qutylmaıtynyn eskertti.
– Kostıým kıgender de, tonnelde tyǵylǵandar da jaýap beredi. TsAHAL sarbazdaryna qarsy qol kótergen ár adam tolyq jaýap beredi, – dedi mınıstr.
Al Eýropalyq odaq barlyq tarapty atysty toqtatý sharttaryn qatań saqtaýǵa shaqyrdy.
– Biz taraptardy kelisimdi buzýy múmkin kez kelgen áreketten bas tartýǵa shaqyramyz. Bul qaqtyǵystyń áskerı sheshimi joq, – dedi Eýropalyq komıssııa ókili Anýar El-Anýýnı.
Eske salaıyq, atysty toqtatý rejımi 2025 jylǵy 10 qazanda kúshine engen bolatyn. Ol 2023 jylǵy 7 qazanda HAMAS jasaǵan shabýyldardan keıin bastalǵan eki jyldyq qaqtyǵystan soń ornaǵan edi.
Buǵan deıin habarlanǵandaı, HAMAS Izraılge buryn anyqtalǵan kepildeginiń súıegin qaıtarǵan.