Izraıl Gaza sektorynda atysty toqtatý rejımin taǵy da buzdy
ASTANA. KAZINFORM — Izraıldiń Han-ıÝnýs qalasyna jasaǵan soqqysynyń saldarynan adamdar jaralandy. Bul týraly Anadoly agenttigi jazdy.
Izraıl armııasy Gaza sektorynyń ońtústiginde ornalasqan Han-ıÝnýs qalasyna soqqy jasap, atysty toqtatý rejımin taǵy da buzdy.
Palestınalyq WAFA aqparat agenttiginiń habarlaýynsha, Izraıldiń ushqyshsyz ushaqtary Han-ıÝnýstyń shyǵys bóligindegi Benı-Sýheıla aýdanyn nysanaǵa alǵan. Nátıjesinde bir top palestınalyq jaraqat aldy.
Budan bólek, artıllerııalyq shabýyl Abasan-Kebır eldi mekenin jáne onyń mańyn, sondaı-aq «Hansa» mektebin qamtydy.
Izraıl áskeri sondaı-aq Gaza sektorynyń ortalyǵyndaǵy Nýseırat bosqyndar lageriniń jaǵalaýynda ornalasqan birneshe qaıyqty atqylady.
2023 jyldyń 8 qazanynda bastalǵan eki jylǵa sozylǵan ızraıldik shabýyldar 2025 jyldyń 10 qazanynda atysty toqtatý týraly kelisimge qol qoıylýymen aıaqtalǵanyna qaramastan, is júzinde Gazaǵa qarsy okkýpatsııa men quqyq buzýshylyqtar jalǵasyp keledi.
2023 jyldyń qazan aıynan beri 68 865 palestınalyq qaza taýyp, 170 670 adam jaralanǵan. Qurbandardyń basym bóligi – áıelder men balalar.
BUU málimetinshe, Gaza sektorynyń 90%-ǵa jýyq ınfraqurylymy qıraǵan, al ony qalpyna keltirý quny shamamen 70 mıllıard dollar dep baǵalanyp otyr.
Kelisim kúshine engennen keıin de Izraıl ony birneshe ret buzdy. Gaza Densaýlyq saqtaý mınıstrliginiń dereginshe, bul buzýshylyqtar saldarynan 226 palestınalyq qaza taýyp, taǵy 600 adam jaralanǵan.
Buǵan deıin Izraıl bıligi HAMAS tobynyń pozıtsııalaryna joıqyn soqqy bergennen keıin Gaza sektorynda atysty toqtatý rejımin qaıta qalpyna keltirgenin habarlaǵan bolatyn.