Izraıl Gaza sektoryna gýmanıtarlyq kómekti jetkizýdi jedeldetýge ýáde berdi

ASTANA. KAZINFORM — Izraıl Qorǵanys armııasy Gaza sektorynda BUU kolonnalarynyń azyq-túlik pen dári-dármek jetkizýin qamtamasyz etý úshin gýmanıtarlyq dálizder qurylatynyn málimdedi, dep habarlaıdy VVS.

Reuters agenttiginiń dereginshe, parashıýt arqyly gýmanıtarlyq júk tastaý qaıta bastaldy. Sondaı-aq TsAHAL halyqaralyq uıymdar usynǵan un, qant jáne konserviler salynǵan «jeti konteınerdi» túsirý josparlanyp otyrǵanyn habarlady. Reuters-tiń palestınalyq derekkózderi de Gaza soltústiginde parashıýttermen túsirilgen júkti kórip jatqanyn rastady.

Gýmanıtarlyq uıymdar parashıýtpen túsirý ádisin kómekti jetkizýdiń tıimsiz tásili dep sanaıdy.

Apta basynda 100-den astam uıym Gazada asharshylyq jaıylyp jatqanyn málimdedi. Alaıda TsAHAL bul aıyptaýlardy joqqa shyǵaryp, ony «HAMAS taratyp otyrǵan jalǵan naýqan» dep atady.

«Gaza halqy arasynda kómekti bólýge BUU men halyqaralyq gýmanıtarlyq uıymdar jaýapty. Sondyqtan olardyń kómekti bólý tıimdiligin arttyrýy jáne HAMAS-tyń qolyna túsýin boldyrmaý boıynsha kúsh salýy kútiledi», – delingen Izraıl armııasynyń habarlamasynda.

Sondaı-aq habarlamada 900 myń turǵyndy qamtamasyz etetin tuşylandyrý zaýytyna elektr qýaty qaıta berilgeni aıtyldy.

Eske sala keteıik, Izraıl naýryzda Gazadaǵy barlyq gýmanıtarlyq kómekti toqtatqan bolatyn. Mamyrda kómekti jetkizý qaıta bastaldy, biraq jańa shekteýlermen. Izraıl beıbit halyqtyń zardap shegýine HAMAS-ty aıyptap otyr.

Buǵan deıin Izraıl Gaza sektoryna azyq-túlikti parashıýtpen túsirýge ruqsat etetinin habarlaǵan edi.