Izraıl Gaza sektoryna áýeden soqqy jasady

ASTANA. KAZINFORM -  Izraıl avıatsııasynyń shabýyldary AQSh-tyń araǵaıyndyǵymen qol jetkizilgen kelisimge kúmán keltirdi, dep habarlaıdy Kazinform agenttiginiń menshikti tilshisi.

Izraıl ushaqtary seısenbi kúni Izraıl HAMAS-ty Palestına aýmaǵyndaǵy atysty toqtatý rejımin buzdy dep aıyptaǵannan keıin Gaza sektoryna soqqy berdi.

AlJazeera-nyń jergilikti densaýlyq saqtaý organdaryna silteme jasaı otyryp habarlaýynsha, áýe shabýyldary saldarynan kem degende 90 adam, sonyń ishinde Gazanyń ortalyǵynda keminde 42 palestınalyq, anklavtyń soltústik bóliginde 31 adam jáne ońtústikte 18 adam qaza tapqan.

Kýágerlerdiń aıtýynsha, Izraıldiń áýe shabýyldary sársenbiniń tańyna deıin búkil Gaza sektory boıynsha jalǵasty.

Shabýyldar Izraıl premer-mınıstri Bınıamın Netanıahý keńsesiniń dereý qýatty soqqy jasaýǵa buıryq bergeni týraly málimdemesinen keıin boldy.

Málimdemede shabýyldardyń naqty sebebi kórsetilmegen. Alaıda Izraıl áskerleri HAMAS anklavtyń Izraıl baqylaýyndaǵy aımaǵynda Izraıl kúshterine shabýyl jasaý arqyly atysty toqtatý kelisimin buzǵanyn málimdedi.

AQSh qoldaǵan atysty toqtatý týraly kelisim 10 qazanda kúshine enip, Gaza sektoryndaǵy eki jyldyq soǵysty aıaqtaǵan edi.

Kelisimniń buzylý qaýpi joq

Osy arada Izraıl men HAMAS bir-birin atysty toqtatý rejımin buzdy dep aıyptap jatyr.

Ótken aptada Izraılge barǵan AQSh vıtse-prezıdenti Djeı Dı Vens sońǵy eskalatsııaǵa qaramastan, «atysty toqtatý tártibi saqtalyp otyr» dep málimdedi.

- Bul qandaı da bir jerde shaǵyn qaqtyǵystar bolmaıdy degendi bildirmeıdi. Biz HAMAS nemese Gazadaǵy basqa bireýdiń sarbazǵa (ızraıldik) shabýyl jasaǵanyn bilemiz. Biz ızraıldikterdiń kek qaıtaratynyn kútemiz, biraq meniń oıymsha, prezıdent buǵan qaramastan sabyr saqtaıdy, - dedi ol tilshilerge.

Prezıdent Tramp sársenbi kúni AQSh qoldap otyrǵan atysty toqtatý rejımine qaýip tónip turmaǵanyn málimdedi.

Onyń aıtýynsha, Izraıl óz sarbazynyń qazasynan keıin jaýap soqqy jasady.

Ne boldy?

Seısenbi kúni Izraıl BAQ-tary Gaza sektorynyń ońtústigindegi Rafah qalasynda Izraıl kúshteri men HAMAS sodyrlary arasynda atys bolǵanyn habarlady.

HAMAS Rafahtaǵy Izraıl kúshterine jasalǵan shabýylǵa jaýapkershilikti moınyna alǵan joq. Sondaı-aq, top Gaza sektoryndaǵy atysty toqtatý týraly kelisimge adal bolyp qala beretinin málimdedi.

Kepilge alynǵandardy izdeý

Budan basqa, seısenbi kúni Izraıl premer-mınıstri Bınıamın Netanıahý HAMAS kepilge alynǵandardyń denelerin Izraılge qaıtarý kezinde keıbir súıekterdi tapsyrýda atysty toqtatý kelisimin buzǵanyn málimdedi.

Netanıahý dúısenbide tapsyrylǵan súıekter 2023 jyldyń 7 qazanynda HAMAS shabýylynda qaza tapqan buryn anyqtalǵan kepilge alynǵan adamǵa tıesili ekenin málimdedi. Tsarfatıdiń súıekterin Izraıl áskerıleri 2023 jyldyń jeltqsanynda tapqan edi.

Jaýap retinde HAMAS Gaza sektoryndaǵy týnnelden tabylǵan, kepildikte joǵalǵan adamnyń denesin seısenbide Izraılge tapsyratynyn málimdedi. Alaıda, HAMAS-tyń «Ál-Kassam brıgadalary» qarýly qanaty keıinirek Izraıldiń atysty toqtatý oejımin buzǵanyn aıtyp, josparlanǵan tapsyrýdy keıinge qaldyratynyn málimdedi.

Seısenbi kúni keshke «Ál-Kassam brıgadalary» Gaza sektoryndaǵy izdeý operatsııalary kezinde eki ızraıldik kepilge alynǵan adamnyń deneleri tabylǵanyn málimdedi.

HAMAS Netanıahý Izraıldiń mindettemelerinen bas tartý úshin syltaý izdep jatyr dep málimdedi. Atysty toqtatý týraly kelisimniń sharttary boıynsha HAMAS soǵys kezinde ustalǵan 2 myńǵa jýyq palestınalyq tutqyn men soǵys kezinde ustalǵan adamdardy bosatty, al Izraıl óz kúshterin shyǵaryp, shabýylyn toqtatty.

Buǵan deıin Túrkııa Izraıldi Gazadaǵy atysty toqtatý rejımin saqtaýǵa shaqyrǵanyn jazǵan bolatynbyz.