Izraıl Gaza operatsııasyn keńeıtý josparyn maquldady
ASTANA. KAZINFORM — Kabınet bekitken josparǵa «Gaza sektoryn jaýlap alý jáne aýmaqty basyp alý» kiredi, dep habarlaıdy Kazinform tilshisi.
Izraıl úkimetiniń áskerı-saıası kabıneti jeksenbi kúni Gaza sektoryndaǵy áskerı operatsııany keńeıtý josparyn biraýyzdan maquldady. Bul týraly Times of Israel Izraıl sheneýnigine silteme jasap habarlaıdy.
Izraıl qorǵanys kúshteri (TsAHAL) bas shtabynyń basshysy general-leıtenant Eıal Zamır usynǵan josparǵa sáıkes, Izraıl armııasynyń Gaza sektoryndaǵy aýmaqty baqylaýǵa alýy, beıbit turǵyndardy ońtústikke kóshirý, HAMAS-qa shabýyl jasaý jáne palestınalyq toptyń gýmanıtarlyq kómekti baqylaýǵa alýyna jol bermeý qajet.
Izraıldik aqparat quraldarynyń habarlaýynsha, bul jospar AQSh prezıdenti Donald Tramptyń kelesi aptada Taıaý Shyǵysqa saparynan keıin ǵana júzege asady. Oǵan deıin HAMAS-pen atysty toqtatý jáne kepilge alynǵandardy bosatý týraly kelisimge kelýge kúsh salynady.
Izraıl telearnasy Kan sheneýnikterge silteme jasaı otyryp, jańa jospar birtindep jáne birneshe aıǵa sozylatynyn, kúshter bastapqyda Gaza sektorynyń bir aımaǵyna shoǵyrlanatynyn habarlady.
Kabınet quramyndaǵy mınıstr Zeev Elkınniń aıtýynsha, ýaqytsha keste AQSh prezıdenti Donald Tramptyń kelesi aptadaǵy sapary aldynda atysty toqtatý jáne kepilge alynǵandardy bosatý týraly kelisimge múmkindik beredi.
— Eger HAMAS bizdiń ustanymymyzdy túsinse, Tramptyń Taıaý Shyǵysqa saparyna áli ýaqyt bar, — dedi Elkın.
Gýmanıtarlyq kómek jańa jolmen qaıta bastalady
Sonymen qatar, mınıstrler kabıneti Gaza sektoryna gýmanıtarlyq kómek jetkizýdi qalpyna keltirý josparyn maquldady, biraq jetkizý mehanızmi HAMAS-tyń ony óz sodyrlaryna burý múmkindigin barynsha azaıtý úshin qaıta qurylatynyn aıtty.
Josparǵa qarsy daýys bergen jalǵyz adam Izraıldiń Ulttyq qaýipsizdik mınıstri Itamar Ben-Gvır boldy. Jospar Gaza sektoryndaǵy jaǵdaı talap etkende kúshine enedi.
Jańa jospardyń máni TsAHAL kómekti ortalyqtandyryp, ony saqtaýdy jáne taratýdy toqtatyp, tapsyrmany Gaza sektoryndaǵy otbasylarǵa azyq-túlik jáshikterin tikeleı taratatyn halyqaralyq uıymdar men jeke merdigerlerge tapsyrady.
Izraıl armııasy taratýǵa tikeleı qatyspaıdy, biraq ızraıldik áskerıler halyqaralyq uıymdar men merdigerler úshin syrtqy qaýipsizdik perımetrin qamtamasyz etedi, deıdi Izraıl jáne arab sheneýnikteri. Izraıl bıligi mundaı tásil HAMAS-tyń gýmanıtarlyq kómekke qol jetkizýin jáne ony sodyrlarǵa qaıta baǵyttaýyn qıyndatady dep esepteıdi.
Gaza sektorynyń úshten bir bóligin baqylap otyrǵan Izraıl AQSh-tyń qoldaýymen eki aı boıy shaıqastardy toqtatqan bitim sharty buzylǵannan keıin naýryz aıynda jerdegi operatsııalardy qaıta bastady. Sodan beri anklavqa baratyn barlyq gýmanıtarlyq kómek tolyǵymen toqtatyldy.
Halyqaralyq Qyzyl Krest komıteti (HQKK) Gaza sektoryndaǵy gýmanıtarlyq operatsııanyń «tolyq kúıreý sheginde» ekenin málimdedi.
Budan buryn habarlanǵandaı, Halyqaralyq sot Gaza sektoryn blokadaǵa baılanysty Izraılge qarsy shaǵymdardy qaraıdy.
Eske salsaq, osyǵan deıin Izraıl Gazadaǵy operatsııasyn keńeıtýdi josparlap otyrǵany málim boldy.