Izraıl Gaza qalasyna shabýylǵa shyqty

ASTANA. KAZINFORM – TsAHAL birneshe aptaǵa sozylǵan bombalaý jáne áýeden jasalǵan soqqylardan soń seısenbi kúni túnde Gazany basyp alý úshin shabýylǵa shyqty, dep habarlaıdy DW.  

Izraıl premer-mınıstri Bınıamın Netanıahý buny HAMAS terrorıstik qozǵalysynyń sońǵy qorǵanysy dep baǵalady.

Amerıkalyq Axios basylymy Izraıldiń anonımdi resmı tulǵalaryna silteme jasap shabýyldyń bastalǵany týraly jazdy.

2025 jylǵy 15 qyrkúıekte keshkisin Izraıl áskerı áýe kúshteriniń Gaza qalasyna soqqy jasaǵany habarlandy. Palestınalyq BAQ málimetinshe, qalaǵa Izraıldiń tank bólimsheleri kirgen.

Ótken demalys kúnderi Izraıl Gaza qalasyna áýe shabýyldarynyń qarqynyn arttyryp, ondaǵan kópqabatty ǵımarattarǵa soqqy jasaǵan.

Izraıl Qorǵanys armııasynyń (TsAHAL) derekterine súıensek, bul nysandar HAMAS uıymy tarapynan áskerı maqsatta paıdalanylǵan. Buǵan deıin Izraıl armııasy Palestına turǵyndaryna Gaza qalasynan ketip, ońtústiktegi «gýmanıtarlyq aımaqtarǵa» kóshý týraly úndeý jasaǵan bolatyn. Osy ýaqytqa deıin shamamen 300 000 adam qaladan ketkeni málim.

Izraıldiń Gazadaǵy shabýyly el premer-mınıstri Bınıamın Netanıahý men úkimettiń joǵary laýazymdy músheleriniń AQSh memlekettik hatshysy Marko Rýbıomen kezdesýinen birneshe saǵat ótken soń bastalǵany aıtylǵan.

Axios basylymy eki ızraıldik sheneýniktiń sózine silteme jasaı otyryp, Rýbıo Netanıahýǵa AQSh prezıdenti Donald Tramptyń Izraıldiń Gazadaǵy qurlyqtyq operatsııasyn qoldaıtynyn jetkizgenin habarlaıdy. Alaıda ol operatsııanyń jyldam ótip, múmkindiginshe tez aıaqtalýyn qalaǵan.

– «Rýbıo qurlyq operatsııasyna kedergi bolǵan joq», – dep keltiredi jýrnalıster óz derekkózderiniń biriniń sózin.

Osyǵan deıin Izraıldiń qarqyndy soqqylarynan keıin Gazadan 300 myńnan asa turǵyn ketkeni týraly jazdyq.