Izraıl Gaza qalasyna basyp kirer aldynda ony evakýatsııalaýǵa buıryq berdi
ASTANA. KAZINFORM — Gaza sektoryndaǵy qaqtyǵysty ýshyqtyrý baǵytyn Izraıl basshylyǵynyń jańa málimdemeleri rastap otyr, dep habarlaıdy Kazinform menshikti tilshisi.
Izraıl armııasy seısenbi kúni alǵash ret Gaza qalasynyń barlyq turǵynyn sektordyń ońtústik beldeýine dereý evakýatsııalaý týraly buıryq berdi. Izraıl qorǵanys armııasy (TsAHAL) baspasóz qyzmetiniń málimetinshe, beıbit turǵyndarǵa qaladan jaǵalaýdaǵy jolmen «gýmanıtarlyq aımaq» retinde belgilengen ál-Mavası aýdanyna qaraı ketýge buıryq berildi.
— Qalada qalý óte qaýipti. Izraıl kúshteri HAMAS-ty talqandaýǵa bekinip otyr jáne Gaza qalasynda úlken kúshpen áreket etedi, — dep málimdedi TsAHAL-dyń arabsha sóıleıtin ókili Avıhaı Adraı.
Úndeýde palestınalyqtardyń sodyrlardyń evakýatsııaǵa jol bermeý áreketteri týraly habarlaýǵa bolatyn telefon nómiri jarııalandy.
Izraıl basshylarynyń málimdemeleri
Izraıl Qorǵanys mınıstri Israel Kats eger HAMAS qarýyn tastamasa jáne eki jylǵa jýyq ýaqyt boıy kepilge alynǵandardyń barlyǵyn bosatpasa, Gaza jer betinen joıylady dep qorqytty.
— Eger lańkester qarýyn tastap, tutqyndardy bosatpasa, olar óltiriledi, al Gaza joıylady, — dep atap ótti Kats.
Onyń X áleýmettik jelisindegi habarlamasynda sońǵy táýlikte Gaza qalasyna jappaı soqqy jasalǵany, sonyń saldarynan 30-ǵa jýyq kópqabatty úıdiń qıraǵany aıtylǵan. Olardyń arasynda Rımal aýdanyndaǵy ar-Rýıa munarasy bar.
Izraıl armııasynyń málimdeýinshe, soqqylar HAMAS-tyń baqylaý jáne Izraıl áskerlerine qarsy shabýyl jasaý úshin paıdalanǵan nysandaryna jasaldy.
Reaktsııalar jáne saldary
Izraıl premer-mınıstri Bınıamın Netanıahý jaqynda Gaza qalasynda «qarqyndy qurlyq operatsııasy» bastalatynyn málimdedi. Jaýap retinde HAMAS qozǵalysy as-Salam munarasynyń qıraýyn «sadızm men qylmystyń eń qatygez kórinisteriniń biri» dep ataı otyryp, qıratýdy aıyptap, onyń saldarymen qorqytty.
Osy arada palestınalyq derekkózder turǵyn aýdandarǵa jańa áýe shabýyldary jáne sektordyń ońtústik bóligine beıbit turǵyndardyń jappaı qonys aýdarýynyń jalǵasýy týraly habarlap otyr.
Buǵan deıin TsAHAL Gaza sektorynyń ońtústiginde gýmanıtarlyq aımaq qurylǵanyn habarlady.