Izraıl ǵaryshtan soqqy jasaýǵa arnalǵan lazerlik qarý ázirlep jatyr
ASTANA. KAZINFORM – Izraıl ǵarysh keńistiginde nysanalardy joıýǵa múmkindik beretin lazerlik qarý júıesin ázirlep jatyr. Bul týraly Izraıldiń qorǵanys mınıstri Israel Kats málimdedi, dep habarlaıdy Kazinform agenttiginiń menshikti tilshisi The Jerusalem Post basylymyna silteme jasap.
Áskerı tilshilerge arnalǵan brıfıngte mınıstrdiń aıtýynsha, qazir álemde ǵaryshtan soqqy jasaý múmkindigine ıe birde-bir memleket joq.
- Bul mindetti júzege asyrý úshin biz eń úzdik mamandardy tartyp jatyrmyz jáne osy salada álemdik kóshbasshy bolýdy maqsat etip otyrmyz. Eger buǵan qol jetkizsek, bul tejeý áleýetimizdi kúsheıtip, qomaqty resýrstary bar qarsylastarymyzǵa qarsy soqqy jasaýǵa, nysanalardy joıýǵa jáne basqa da mindetterdi oryndaýǵa múmkindik beredi, – dedi Israel Kats.
Izraıl qazirdiń ózinde lazerlik tehnologııalar salasyndaǵy jetekshi elderdiń biri sanalady. Elde Iron Beam dep atalatyn jerústi lazerlik áýe qorǵanysy júıesi jasalǵan. Qýaty 100 kılovatt bolatyn bul keshen álemdegi alǵashqy joǵary energııaly jumys isteıtin lazerlik áýe qorǵanys júıesi retinde baǵalanady.
Buǵan deıin Izraıl áskeri Lıvannyń ońtústiginde uzyndyǵy 200 metrden asatyn jerasty týnnelin joıǵany habarlanǵan bolatyn.
Izraıl tarapynyń málimetinshe, onda qarý-jaraq saqtalyp, zymyran ushyrý qondyrǵylary ornalasqan.
