Izraıl ǵalymdary shólde tereńnen sý shyǵaryp, balyq ósiretin teńizge aınaldyrdy
ASTANA. 10 qazan. QazAqparat - Shól dalanyń qaq ortasynda teńiz balyǵyn ósirý - adam aıtsa sengisiz jaǵdaı. Alaıda, ızraıldik ǵalymdar buǵan qol jetkizdi,
dep habarlaıdy jetinshi arna.
- Biz shóldiń qaq ortasynda tereńdigi 1 shaqyrym qashyqtyqqa jýyq uńǵyma qazdyq. Al, sol jerden shyqqan sýdyń tuzdylyǵy teńizdikine óte uqsas. Teńiz balyǵy teńizde tirshilik etýi tıis, - deıdi ǵalym Amı Býnkovskıı.
Qazir jasandy sý aıdynynda taıdaı týlaǵan teńiz balyǵynda esep joq. Túri de kóp. Qarmaq salǵan balyqshy úıine oljasyz qaıtpaıdy. Al erteginiń shyndyqqa aınalýyna kompıýterdiń arqasynda múmkin boldy. Tehnıka sý qoımasyndaǵy jaǵdaıdy baqylaıdy. Balyq jeminiń bar-joǵyn, sýdyń tazalyǵyn jáne ottegi mólsherin qadaǵalaıdy. Tipti, lastanǵan sýdy arnaıy basseınge tógip, tazasyn quıady. Bastysy - elektr jaryǵy óshpeýi tıis. Áıtpese, balyq jarty saǵattyń ishinde tunshyǵyp, qyrylyp qalýy múmkin.
- Bul - teńizderdiń tabıǵatyn saqtap qalýdyń tamasha amaly. Osylaısha biz olardyń óz qalpyna kelýine múmkindik beremiz,- deıdi Shól dalany damytý ınstıtýtynyń professory Avıgard Vonshak.
