Izraıl Frantsııa prezıdenttigine úmitker Melanshonǵa elge kirýge tyıym saldy
ASTANA. KAZINFORM — Izraıl bıligi Frantsııa prezıdenttigine úmitker, solshyl saıasatker Jan-Lıýk Melanshondy elge kirýge tyıym salynǵan tulǵalar tizimine engizdi. Buǵan onyń Izraılge qatysty «asa óshpendi ustanymy» sebep bolǵan. Bul týraly Report.az ızraıldik BAQ-qa silteme jasap habarlady.
Izraıl Syrtqy ister mınıstrliginiń málimdemesine sáıkes, Frantsııanyń «Baǵynbaıtyn Frantsııa» (LFI) partııasynyń jetekshisi Jan-Lıýk Melanshon men onyń parlamenttik fraktsııasynyń tóraıymy Matılda Panoǵa Izraıl aýmaǵyna kirýge tyıym salynǵan.
Izraıl Syrtqy ister mınıstrligi mundaı sheshimge atalǵan partııanyń Izraılge qarsy ustanymy men onyń basshylarynyń elge taǵylǵan aıyptary bar málimdemeleri negiz bolǵanyn habarlady.
Sondaı-aq Izraıl bıliginiń narazylyǵyn Melanshonnyń Frantsııa áskerı kemelerin Gaza sektoryna baǵyt alǵan gýmanıtarlyq flotılııalardy alyp júrýge jiberý týraly úndeýi týǵyzǵan.
Izraıl Syrtqy ister mınıstrliginiń málimetinshe, bul sheshimdi eldiń syrtqy ister mınıstri ári ishki ister mınıstri Gıdeon Saar qabyldaǵan.
Eske salaıyq, buǵan deıin Jan-Lıýk Melanshon 2027 jylǵy prezıdent saılaýynda jeńiske jetken jaǵdaıda Frantsııa áskerı-teńiz kúshterin Gaza sektoryna bet alǵan gýmanıtarlyq flotılııalardy qorǵaýǵa jiberýge ýáde bergen bolatyn.
