Izraıl eliniń sımfonııalyq orkestri qazaq kompozıtorlarynyń shyǵarmalaryn oryndady
/strong>Sáýirdiń 14-i. QazAqparat /Názıra Eleýhan/ - Sáýir aıynyń 8-i kúni Táýelsiz Qazaqstannyń jáne qazaq mýzykasy tarıhynda tuńǵysh ret Izraıl eliniń sımfonııalyq orkestri qazaq kompozıtorlarynyń shyǵarmalaryn oryndaldy. Sharanyń ereksheligi - kontserttik baǵdarlama tolyǵymen qazaq kompozıtorlarynyń týyndylaryna arnaldy.
Kontsert Tel-Avıv qalasynyń «Rekonatsı» kontsert zalynda ótti. Bul týraly búgin Almatyda ótken arnaıy baspasóz máslıhatynda QR Kompozıtorlar odaǵy tóraǵasynyń orynbasary Artyq Toqsanbaev málim etti, dep habarlaıdy QazAqparat.
Qurmanǵazy atyndaǵy Qazaq Memlekettik konservatorııasynyń prorektory Aqtoty Raıymqulovanyń aıtýynsha, buǵan deıin shet memleketterde qazaq mýzykasyn qazaqstandyq ujymdar, nemese sheteldik ujymdar qazaq avtorlarynyń jekelegen shyǵarmalaryn ǵana oryndaǵan. «Bizdiń elimiz munaı- gazben ǵana emes, sheber kompozıtorlar mektebimen de maqtan tuta alady. Izraıl mýzykanttary: «Qazaqstanda myqty kompozıtorlar mektebi qalyptasqan, dástúrli mýzykamen qatar, ár túrli baǵyttaǵy mýzyka túrlerine baı el eken dep atap ótti», dedi Aqtoty Raıymqulova.
«Kontsertte «Tuan» folklorly-etnografııalyq ansambli de óner kórsetti. Kórermender alǵash ret Baqtııar Amanjoldyń, Álibı Ábdinurovtyń, Beıbit Dáldenbaıdyń, Habıbýlla Setekovtyń, Aqtoty Raıymqulovanyń jáne Ermek Ómirovtyń shyǵarmalarymen jáne dástúrli qazaq mýzykasymen tanys boldy. Kontsert aldynda Qazaqstan tarıhy men búgingi kúni týraly derekti fılm kórsetildi. Sondaı-aq, kontsert zalynda elimiz týraly arnaıy kórme qoıyldy. Kórermender bizdiń ansambldi uzaq jibermeı, ónerimizdi joǵary baǵalady», dedi QR Kompozıtorlar oaǵy tóraǵasynyń orynbasary Artyq Toqsanbaev.
