Izraıl elde úsh aptalyq qatań karantın engizbek
IERÝSALIM. QazAqparat – Izraıl juma kúninen bastap koronavırýstyń ekinshi tolqynynan keıin indettiń taralýyn boldyrmaý úshin úsh aptalyq qatań karantın engizedi.
Bul týraly eldiń Premer-mınıstri Benıamın Netanıahý málim etken, dep habarlaıdy QazAqparat Reuters agenttigine silteme jasap.
Ulttyq meıramdar qarsańyna tuspa-tus kelgen karantın ýaqytynda el azamattaryna úılerinen 500 metrden astam qashyqtyqta júrýge tyıym salynady, biraq olar shekteýli rejımde jumys isteıtin keńselerge bara alady.
Mektepter men saýda ortalyqtary jabylady, tek sýpermarketter men dárihanalar jumys isteıdi. Úkimettik uıymdar qysqartylǵan quramda jumys isteıtin bolady, al klıenttermen jumys istemeıtin memlekettik emes agenttikter men kásiporyndar ashyq bolady.
Qarjy mınıstrligi oqshaýlaý koronavırýstyń saldarynan retsessııaǵa ushyraǵan ekonomıkaǵa shamamen 6,5 mıllıard shekel (1,88 mıllıard dollar) shyǵyn ákeledi dep málimdedi.
Netanıahý Qarjy mınıstrine karantınnen zardap shekken kásiporyndarǵa kómektesý úshin jańa ekonomıkalyq paket ázirleýdi tapsyrǵanyn aıtty.
Aýrý juqtyrǵandar sany kúrt artyp, ótken aptada 4000-nan asty, senbi kúni 2 715 adam indetke shaldyqqan. Pandemııa bastalǵannan beri Izraılde 1 108 adam qaıtys boldy.
Netanıahýdyń aıtýynsha, bul alańdatarlyq jaǵdaı boldy jáne úkimetti áreket etýge ıtermeledi.
Densaýlyq saqtaý mınıstrliginiń basshysy Hezı Levı jeksenbi kúni radıo suhbatynda qatań shekteýler engizý kerek dep málimdedi. Bul sharalar eldegi vırýstyń jańa tolqynyn toqtata alady.
