Izraıl Mysyrmen quny 35 mıllıard dollar turatyn gaz kelisimin jasasty
ASTANA.KAZINFORM — Bul kelisim eldiń energetıka salasy tarıhyndaǵy eń iri kelisim boldy jáne uzaq merzimge josparlanǵan, dep habarlaıdy Kazinform agenttiginiń menshikti tilshisi.
Izraıl premer-mınıstri Bınıamın Netanıahý sársenbi kúni Mysyrmen jasalǵan el tarıhyndaǵy eń iri tabıǵı gaz eksporty týraly kelisimniń maquldanǵanyn jarııalady. Ol kelisimniń jalpy quny 112 mıllıard shekeldi nemese shamamen 35 mıllıard dollardy quraıtynyn málimdedi.
Energetıka mınıstri Elı Koenmen birlesip málimdeme jasaǵan Izraıl premer-mınıstri bul somanyń shamamen 58 mıllıard shekeli (18 mıllıard dollar) memlekettik bıýdjetke túsetinin atap ótti. Kelisimdi iske asyrýdyń alǵashqy tórt jylynda memlekettik kiris shamamen 155 mıllıon dollardy quraýy tıis, al 2033 jylǵa qaraı jyldyq kiris 1,9 mıllıard dollarǵa deıin artýy múmkin.
— Bul qarajat bilim berý, densaýlyq saqtaý, ınfraqurylymdy damytýǵa jáne qaýipsizdikti qamtamasyz etýge jumsalady, — degen Netanıahý, kelisimdi tek qaýipsizdik máselelerin qosa alǵanda, Izraıldiń múddesi úshin tıimdi bolatyndyǵyn qarastyrǵannan keıin ǵana maquldaǵanyn atap ótti.
Izraıl energetıka mınıstri Elı Koen kelisimdi tarıhı kelisim dep atap, onyń el tarıhyndaǵy eń iri eksporttyq kelisim ekenin atap ótti. Onyń aıtýynsha, tabıǵı gaz Izraıl úshin strategııalyq aktıv bolyp tabylady.
Kelisim amerıkalyq Chevron energetıkalyq kompanııasynyń qatysýymen Levıafan ken ornynan Izraıl gazyn Mysyrǵa jetkizýdi kózdeıdi. Kelisimge sáıkes, seriktester 2040 jylǵa deıin Mysyrǵa 130 mıllıard tekshe metr gaz satady.
Levıafan ken ornyn paıdalaný quqyǵy 2020 jyldyń qazan aıynda amerıkalyq energetıka alyby Chevron satyp alǵan Noble Energy (39,66%), NewMed Energy Partnership (45,33%) jáne Ratio Oil Exploration (15%) arasynda bólingen.
Israel Hayom málimeti boıynsha, satyp alýshy — Mysyrdyń BOE (Blue Ocean Energy) energetıkalyq kompanııasy.
Mysyr tarapy áli kelisim boıynsha resmı túsinik bergen joq.
Qyrkúıek aıynda Izraıldiń Israel Hayom gazeti Netanıahý onyń maquldaýynsyz Mysyrmen iri kólemdi gaz kelisimin alǵa jyljytpaý týraly nusqaý bergenin habarlady. Bul Tel-Avıvtiń Kaırdiń Sınaıǵa áskerlerin ornalastyrý arqyly eki el arasynda qol qoıylǵan «beıbitshilik kelisimin buzdy» degen aıyptaýlary aıasynda boldy. Egıpet bul aıyptaýlardy joqqa shyǵarady.
Buǵan deıin Izraıl BAQ-tary Izraıl kelisimdi maquldamasa, Egıpet gazben jabdyqtaý úshin Katarǵa júginýi múmkin ekenin habarlaǵan bolatyn. Osy habarlamalardan keıin Netanıahýdyń ustanymy ózgergeni, atap aıtqanda, ol Egıpetpen gaz kelisiminiń aıaqtalýyn maquldaǵany týraly habarlandy. Izraıl men Egıpet 1979 jyldan beri dıplomatııalyq qarym-qatynastardy saqtap keledi jáne buryn Egıpet ınfraqurylymy arqyly gaz eksporttaýdy qosa alǵanda, birlesken energetıkalyq jobalardy júzege asyrǵan.
Aıta keteıik, Izraıl jaqyn kúnderi «Rafah» shekara ótkelin ashpaqshy.