Izraıldiń «Bereshıt» apparaty Aıǵa qonarda apatqa ushyrady
NUR-SULTAN. QazAqparat - Izraıldiń Aıǵa ushyrǵan alǵashqy apparaty «Bereshıt» Jerdiń tabıǵı serigine qonarda sátsizdikke ushyrady, dep habarlaıdy «QazAqparat» HAA, VVS-ge silteme jasap.
Apparat Falkon-9 zymyranynyń kómegimen 22 aqpan kúni ushyrylǵan. Ol buǵan deıin Aıǵa jiberilgen apparattardyń ishindegi eń shaǵyny: dıametri 2 metrge jýyq, salmaǵy 600 keli.
Ol Aıǵa Izraıldiń táýelsizdik týraly deklaratsııasyn, gımnin, ártúrli fotosýretterdi de jetkizdi.
Izraıldiń qazirgi premer-mınıstri Bınıamın Netanıahý apparattyń sátsizdikke ushyraǵany týraly pikirin bildire otyryp, Izraıl birneshe jyldan keıin Aıǵa apparat ushyrýǵa qaıta kirisetinin jetkizdi.
«Eger alǵashqyda sátsiz bolsa, keıin taǵy da áreket etip kórińiz», - dedi premer.
Aıta keteıik, Izraıldiń apparaty jekemenshik qarajat esebinen ushyrylǵan. Onyń bıýdjeti de osy taqylettes basqa jobalarǵa qaraǵanda áldeqaıda yqsham: 100 mln dollar.
