Izraıldikter Aqtóbedegi jedel járdem aýrýhanasyna hırýrgııalyq korpýs salyp beredi
AQTÓBE. QazAqparat - Izraıl ınvestorlary Aqtóbedegi jedel járdem aýrýhanasyna hırýrgııalyq korpýs salyp beredi. Bul týraly Aqtóbede Qazaqstan-Izraıl bıznes forýmynda aıtyldy, dep habarlaıdy QazAqparat tilshisi.
Aqtóbege medıtsına klasterin damytý jumysy tapsyrylǵan soń óńirde jańa medıtsınalyq emdeý oryndary salyna bastady. Ótken jyly túrik kásipkerleriniń qatysýymen memlekettik-jeke menshik seriktestik aıasynda qalalyq jedel járdem beketiniń qurylysy bastalyp, reanımobıl kólikteri jetkizildi. Al búgin ızraıldik kásipkerlerdiń Aqtóbedegi jedel járdem aýrýhanasyna hırýrgııalyq korpýs salyp beretini belgili boldy.
«Aqtóbe qalalyq jedel járdem beketiniń quny 5,5 mıllard teńge turady. Qurylys bastalyp, qazir túrik ınvestorlary jetkizgen reanımobıl naýqastarǵa qyzmet kórsetip jatyr. Sonymen qatar, memlekettik-jeke menshik seriktestik aıasynda oftalmologııa, stomatologııa emhanalary ashylady. Al Izraıl jedel járdem aýrýhanasyna hırýrgııalyq, balalar aýrýhanasyna onkogematologııalyq korpýs salyp beredi», - dedi Aqtóbe oblystyq densaýlyq saqtaý basqarmasynyń basshysy Áset Qalıev.
Aıta keteıik, Aqtóbede 2014 jyldan bastap búırek, baýyr aýystyrý otasy jasalyp jatyr. Qazirgi kúni 6 baýyr, 18 búırek aýystyrý otasy jasalǵan. Eki donordyń kómegimen búırek aýystyryldy.
«Túnde ǵana máıittik donordyń kómegimen búırek aýystyrý otasy jasaldy. Qazir búırek aýystyrý otasyn jergilikti dárigerler jasap jatyr»,- dedi Áset Qalıev.
Eske salsaq, Aqtóbede Qazaqstan-Izraıl bıznes forýmy ótip jatyr. Oǵan oblys ákimi Berdibek Saparbaev pen Izraıldiń Qazaqstandaǵy Tótenshe jáne Ókiletti elshisi Mıhael Brodskıı qatysyp otyr.
