Izraıldik tarıhshy Pýtınmen bolǵan kezdesýde Baýyrjan Momyshulynyń sózderin keltirdi (FOTO, VIDEO)

ASTANA. QazAqparat - Izraıldik tarıhshy, «ıAd va-Shem» (Izraıl) Ultshyldyq qurbandary ulttyq ınstıtýtynyń qyzmetkeri Aron Shneer Kremlde Jalpyulttyq tarıhı jınalysta Vladımır Pýtınmen bolǵan kezdesýde Baýyrjan Momyshulynyń sózderin keltirdi.

«1946 jyly ıvrıt tiline Aleksandr Bektiń «Volokolamsk tas joly» atty kitaby aýdaryldy. Jańa memleket - Izraıl qurylǵan kez edi.  Bul kitap ızraıldik ofıtserlerge qarý tabystaǵan kezde birge beriletin. Bul tek oqý quraly ǵana emes, áskerı is-qımyl jasaýdyń daıyn nusqaýlyǵy bolatyn. General, Izraıl Qarýly kúshteri bas shtabynyń bastyǵy Mota Gýr, óziniń esinde máńgi qalǵan oqıǵasymen bólisti. Ol rota komandıri bolǵan kezde, qorqyp, qashyp ketken qol astyndaǵy sarbazdarǵa qarap, osy kitaptyń alǵysózin oqıdy da, Keńes Odaǵynyń Batyry - óte keremet adam, kombat Momyshulynyń sózderin keltiredi - «Sen jaýyngerlik pozıtsııany tastap kettim dep oılaısyń ba? Sen Máskeýdi berip qoıdyń!». Sońyra: «Osy sózderden soń, kitapty oqýdy doǵardym da, burylyp ketip qaldym. Soldattarym meni sol kezde uqqanyna senimdi boldym», - degeni bar. Basqa armııa, basqa memleket, biraq bul Izraıl armııasyna ónege bolǵan oqıǵa erliktiń, batyrlyqtyń asqan júrektiliktiń úlgisin kórsetken tarıh sabaqtarynyń biri boldy», - dedi ol. 

Aron Shneer 1951 jyly Latvııanyń Lýdza qalasynda dúnıege kelgen. Latvııada turǵan onyń januıasy men týǵan-týystary 64 múshesinen ultshyldardyń qýdalaýy kezinde óltirildi. Shneer 1975 jyly Daýgavpıls pedagogıkalyq ınstıtýtynyń tarıh-fılologııa fakýltetin jáne 1984 jyly Rıgada Latvııa ýnıversıtetiniń tarıh fakýltetin bitirgen. 1990 jyldan beri Ierýsalımde turady. 1941-1945 jyldarda tutqynǵa túsken keńes áskerleriniń taǵdyrlary jaıynda «Plen» atty eki tomdyq zertteý kitabynyń avtory. 2013 jyly doktor Aron Shneer Pýshkın medalimen marapattaldy.