Izraıldik dáriger Astanadaǵy analar ólimi týraly: Bizdiń elde bolsa osylaı aıaqtalar edi
ASTANA. QazAqparat - Izraıldik dárigerler Astana perzenthanasynda qaıtys bolǵan áıelderdiń ólimin aldyn alý múmkin bolmaǵanyn aıtty, dep habarlaıdy Elorda Info.
«Shyn máninde birneshe oqıǵa boldy, bul bizdi aınalyp ótpedi. Biz - komıssııa emespiz, eshqandaı resmı qorytyndy berý úshin shaqyrylǵan joqpyz. Áriptes retinde bul oqıǵaǵa «biz ne ister edik?» degen turǵydan qaraımyz. Basqalaı isteýge bolar ma edi? Barlyq qujattarmen tanysyp, qalanyń qazirgi ómir súrip jatqan jaǵdaıynda ol áıelderdi aman alyp qalý múmkin bolmaǵanyn kórip otyrmyz. Bizdiń elde bolǵan jaǵdaıda, osylaı aıaqtalar edi», - dedi MVI medıtsınalyq ortalyǵynyń bas dırektory Natalıa Meleh-Hedvat №1 perınataldyq ortalyqta bolǵan baspasóz máslıhatynda.
Onyń aıtýynsha, mundaı jaǵdaıdy boldyrmaý úshin kóp nárse jasaýǵa bolatynyn aıtty. Medıtsınalyq ortalyqtyń mamandary Astanada sheberlik synyptarn ótkizedi.
«Bul jumys halyqtyń áleýmettik daıyndyǵy deńgeıinen bastalady, ony tutas ózgertý kerek. Mindetti profılaktıka, áıeldiń óziniń densaýlyǵyna degen áleýmetti jaýapkershilik bolýy kerek. Bir jaǵdaıda belgili bolǵany, áıel birde-bir ret tekserýden ótpegen, tuqym qýalaıtyn aýrýdyń bolýy qaıǵyly oqıyǵanyń sebebi bolýy múmkin», - dedi ol.
Izraıldik maman Astananyń ana óliminiń statıstıkasy keıbir damyǵan eldermen salystyrǵanda jaqsy ekenin aıtty.
«Statıstıka óte jaqsy, keıbir eýropalyq standarttarǵa qaraǵanda áldeqaıda joǵary. Mysaly, Amerıkaǵa qaraǵanda eki ese jaqsy. Bolǵan jaǵdaıdar sáıkestik qana. Eki jylda bul qalada ondaı oqıǵa oryn almaǵan bolatyn», - dedi ol.
Eske sala keteıik, Astananyń №2 perınataldy ortalyǵynda bir ana, al №1 perınataldyq ortalyqta úsh áıel kóz jumǵan edi.
