Izraılden jetkizilgen sálemdeme elordadaǵy elshilik qyzmetkerlerin ábigerge saldy
NUR-SULTAN. QazAqparat – Tel-Avıv qalasynan jetkizilgen kúmándi sálemdeme elordadaǵy Izraıl elshiliginiń qyzmetkerlerin ábigerge saldy, dep habarlaıdy QazAqparat tilshisi.
«Poshta arqyly kúmándi belgileri bar eki qapshyqtyń jetkizilýi faktisi boıynsha Izraıl Elshiliginen tıisti habarlama kelip tústi. Atalǵan sálemdeme Almaty arqyly Tel-Avıv qalasynan jetkizilgeni anyqtaldy», - delingen elorda Polıtsııa departamenti baspasóz qyzmetiniń málimetinde.
Oqıǵa ornyna jedel jetken polıtsııa qyzmetkerleri Elshilik ornalasqan «Azııa» bıznes ortalyǵyn qorshaýǵa aldy. Ol jerge Polıtsııa departamentiniń tergeý toby, kınologtar men qalalyq tıisti qyzmetter tartyldy. Mamandar ǵımarat pen sol mańaıdaǵy aýmaqty tekserip shyqty.
«Tekserý barysynda polıtsııa qyzmetkerleri qapshyqtarda qaýipti zattar joq ekenin anyqtady, oǵan tek jeke zattar salynǵan», - delingen habarlamada.
Aıta ketsek, buǵan deıin áleýmettik jelide «Azııa» bıznes ortalyǵynyń qorshalǵany týraly sýretter jarııalanǵan.
