Izraıl deldaldardyń bitimgerlik kúsh-jigeri aıasynda Gaza sektoryna soqqy jasady
ASTANA. KAZINFORM — Gaza anklavynyń ońtústik bóliginde Izraıldiń áýe jáne teńiz arqyly jasaǵan shabýyldary tirkeldi. Bul ýaqytta deldal elder atysty toqtatý jónindegi kelisimdi iske asyrýdyń kelesi qadamdaryn talqylap jatyr, dep habarlaıdy Kazinform agenttiginiń menshikti tilshisi.
Palestınanyń WAFA aqparat agenttiginiń málimetinshe, Izraıl qarýly kúshteri Gaza sektorynyń ońtústigindegi Han-ıÝnıs pen Rafah aýdandaryna áýeden jáne teńiz ar0yly soqqy jasaǵan.
Han-ıÝnıstiń shyǵysyndaǵy Banı-Sýheıla aýdanynda Izraıl avıatsııasy turǵyn úılerge soqqy bergen. Sonymen qatar qalanyń shyǵys bólikterine pýlemetten oq atylyp, artıllerııalyq atqylaý júrgizilgen. Habarlarǵa qaraǵanda, Izraıldiń áskerı-teńiz kúshteri de Han-ıÝnıs jaǵalaýynda oq jaýdyrǵan.
Al Rafah aýdanynda Izraıl katerleri jaǵalaýǵa jaqyn mańda júrgen balyqshy kemelerine pýlemetten oq atqan. Qaza tapqandar nemese zardap shekkender týraly aqparat túsken joq.
Atalǵan shabýyldar 10 qazannan bastap kúshine engen Gaza sektoryndaǵy atysty toqtatý rejımi aıasynda bolǵan. Palestına tarapy anklav aýmaǵyndaǵy azamattyq nysandarǵa qarsy áskerı áreketterdiń jalǵasyp jatqanyn málimdep otyr.
🚨🇺🇸🇶🇦🇪🇬🇹🇷White House envoy Steve Witkoff will meet Friday in Miami with senior officials from Qatar, Egypt and Turkey to discuss the next phase of the agreement for ending the war in Gaza. My story on @axios https://t.co/izfjFr0SjE
— Barak Ravid (@BarakRavid) December 18, 2025
Osy ýaqytta AQSh Memlekettik departamentiniń habarlaýynsha, AQSh prezıdentiniń Taıaý Shyǵys jónindegi arnaıy ókili Stıv Ýıtkoff juma kúni Qatar, Mysyr jáne Túrkııa ókilderimen kezdesý ótkizýdi josparlap otyr. Bul elder Gaza sektoryndaǵy atysty toqtatý jónindegi kelissózderde deldal retinde qatysyp otyr.
Kezdesý Maıamı qalasynda ótip, Izraıl men HAMAS qozǵalysy arasyndaǵy atysty toqtatý týraly kelisimniń ekinshi kezeńin iske asyrý máselelerine arnalmaq.
Eske sala keteıik, buǵan deıin Izraıl Gazaǵa taǵy da soqqy bergenin jazǵan edik.