Izraılde taǵy myńdaǵan demonstrant sot reformasyna qarsylyq bildirdi
TELЬ-AVIV. QazAqparat – Tel-Avıvte 2 tamyz kúni myńdaǵan adam sot reformasyna qarsy demonstratsııaǵa shyqty. Izraıl premer-mınıstri Bınıamın Netanıahý úkimeti ótken aptada sot reformasy týraly alǵashqy zań jobasyn maquldaǵannan beri narazylyq tolqyny báseńdegen joq, dep habarlaıdy QazAqparat Armenpress-ke silteme jasap.
Sherýshiler sot júıesin qoldaıtyndyqtaryn bildirip, tómengi sot ǵımaratyna deıin júrip ótti. Sherýdi Izraıldiń burynǵy ádilet mınıstrleri men Joǵarǵy sottyń burynǵy sýdıasy basqardy.
24 shildede Netanıahý jáne onyń koalıtsııalyq seriktesteri «durys oılaý týraly zań» dep atalatyn reformalar paketindegi alǵashqy zań jobasyn maquldady. Ol sýdıalarǵa sot negizsiz dep tapqan Úkimettiń sheshimderin joıýǵa tyıym salady.
Zańǵa qarsy aryz-talaptar Joǵarǵy sotqa joldandy. Ony 15 sýdıadan turatyn kollegııa qyrkúıekte qaraıdy.
Netanıahý maquldaǵaly otyrǵan kelesi zań jobasy sýdıalardy taǵaıyndaý kezinde úkimettiń yqpal etýine basymdyq beredi.
Izraılde sot reformasyna qarsy sherýler 30 aptadan beri jalǵasyp jatyr. Synshylardyń pikirinshe, Netanıahý ózine qarsy yqtımal úkimderdiń kúshin joıý úshin sot reformalaryn qoldanýǵa tyrysyp jatyr. Netanıahý jemqorlyqqa qatysty aıyptalǵan bolatyn. Al, Netanıahý úkimeti sot reformalary bılik tarmaqtary arasyndaǵy tepe-teńdikti saqtaý úshin qajet dep sanaıdy.
Buǵan deıin QazAqparat sarapshysy «Bul reformanyń máni nede? Izraıl halqy nelikten buǵan qarsy shyǵyp otyr? Bılik pen halyq nege kelisimge kele almady?» degen sııaqty saýaldarǵa jaýap izdep kórdi.
