Izraılde nápaqasynan aıyrylǵan halyq sherýge shyqty
ASTANA. QazAqparat - Izraıldiń ońtústiginde halyq eńbekkerlerdiń jumystan jappaı qysqartylýyna baılanysty narazylyq aktsııasyn uıymdastyryp jatyr, dep habarlady www.24.kz.
Kásipodaq músheleri aımaqta eńbek daýy órship turǵanyn habarlady. Quramynda ondaǵan kásiporny bar iri hımııalyq kontsernderdiń biri 300-den astam qyzmetkerin jumystan shyǵarǵan.
Qazir Izraılde 300-den astam otbasy osyndaı jaǵdaıda otyr. Eldegi «Hımıkalıım le-Israel» atty iri kontsern óz eńbekkerlerine jumystan bosatý týraly eskertý jibergen. Buǵan halyq narazylyq bildirip qala kóshelerine jappaı ereýilge shyqty. Ereýilder bir apta boıy jalǵasyp keledi. Jumysshylardy qoldap dárigerler, muǵalimder, stýdentter men memlekettik qyzmetkerler de shyqty. Jınalǵan jurt jappaı qysqartý qarjy daǵdarysyna qatysy bar ekenine senbeıdi. Olardyń pikirinshe, jumys berýshiler qarajatty únemdep, óz qaltalaryna salýdy oılap otyr. Nápaqasyz qalǵan turǵyndardyń ashý-yzasynda shek joq. Tipti qysqartý týraly hat ákelgenderge qol kótergender de bar. Al kontsern basshylyǵy bul jaıtqa qatysty tolyq aqparat bermeı, tilshilermen resmı hat arqyly ǵana habarlasady.
- «Kásipodaq músheleri men jumysshylar komıteti kásiporyndy ózine baǵyndyrý úshin qoqan-loqqy jasap otyr. Bizdiń oıymyzsha, olardyń bul áreketteri - parlament saılaýy aldynda ádeıi uıymdastyrylǵan shara. Olar osylaısha kóbirek daýys jınaǵysy keledi. Biz qysqartýǵa ilikken barlyq azamattarǵa tıisti tólem tólenetinine ýáde beremiz», delingen «Hımıkalıım le-Israel» kontserni jazǵan resmı hatta.
Kásipodaq ta alǵan betten qaıtpaýǵa bekingen. Úkimetke osy máselege aralasyp, jappaı qysqartýdy boldyrmaý týraly ótinish bildirdi.
