Izraılde adam aǵzalaryn satýmen aınalysqan general tutqyndaldy
ASTANA. Sáýirdiń 9-y. QazAqparat - Izraılde adam aǵzalaryn satýmen aınalysyp kelgen alaıaqtar tobynyń joly kesildi. ITAR-TASS agenttiginiń habarlaýynsha, Nazaret soty quramyna burynǵy general men eki advokat kiretin alty kúdiktiden turatyn topty qamaýǵa alý týraly sanktsııa berdi.
Polıtsııa málimetteri boıynsha, otstavkadaǵy general Meır Zamır aqshaǵa muqtaj ızraıldyqtardy óz organdaryn satýǵa kóndirip, operatsııa jasaý úshin olardy «Azııa men Shyǵys Eýropanyń birqatar elderine» alyp shyǵatyn alaıaqtar tobyna kirgen. Donorlar ózderiniń retsıpıentterge týys ekendigi týraly jalǵan qujatqa qol qoıatyn bolǵan, biraq ýáde etilgen ondaǵan myń dollardyń ornyna Izraılge kelgen soń birneshe júz dollar ǵana alatyn bolǵan, al keıbireýlerine alaıaqtar kók tıyn da ustatpaǵan. Al aldanǵan adamdardyń qoldarynda olardyń donor bolǵandaryn qýattaıtyn eshqandaı medıtsınalyq qujat bolmaǵandyqtan, olardyń shaǵym-aryzdaryna eshkim qulaq asa qoımaǵan. Al kásipkersymaqtar ár búırek úshin jeke klıentterden 120 myń dollarǵa deıin aqsha alyp kelgen.
