Izraılde 2500 jyl burynǵy parsy qalasy tabyldy
IERÝSALIM. QazAqparat – Izraıl arheologteri 2500 jyl burynǵy kóne parsy qalasyn tapty. Bul týraly beısenbi kúni Izraıldiń kóne zattar basqarmasy (IAA) málimdedi, dep habarlaıdy QazAqparat Xinhua agenttigine silteme jasap.
Izraıldiń soltústigindegi Jerorta teńizi jaǵalaýyndaǵy qazirgi Nagarııa qalasynyń aýmaǵynda ornalasqan úıindilerden ǵımarat pen kósheleri, saýda jáne óndiris aımaǵy bar, dinı oryndar men úlken qoımasy bar adamdar turǵan aýdandar anyqtaldy.Arheologterdiń sózinshe, alys elderden ejelgi teńizshiler – fınıkııalyqtar ákelgen keramıka tostaqtar, qumyralar, amforalar men basqa da zattar tabylǵan.
Olar sol kezeńderde Parsy ımperııasy men ejelgi Grekııanyń qarym-qatynasy shıeleniskenine qaramastan, qala turǵyndary Jerorta teńiziniń shyǵys bóligindegi teńiz saýdasynda negizgi orynda bolǵan fınıkııalyqtar arqyly Grekııamen saýda qatynasyn jasaǵan.
Sondaı-aq zertteýshiler qala turǵyndary qurylys týraly bilim men tehnologııa almasyp otyrǵanyn anyqtaǵan.
Arheologtardyń sózinshe, qalanyń mádenıeti jan-jaqty bolǵan. Onda qarapaıym parsylyq basqarý júıesi men grek qalalarynyń mádenıeti áser etken tehnologııa da bar.
Mysaly, ónerkásiptik aımaqta tabylǵan suıyqtyqty qaıta óńdeýge arnalǵan sylanǵan bólme beton tóseý tehnologııasymen salynǵan. Mundaı ádis parsy kezeńinde keń taralmaǵan edi, biraq keıingi kezeńderde Grekııamen qarym-qatynas áserinen paıda boldy.
