Izraıl dárigerleri Atyraýda jergilikti áriptesterimen birge ota jasaıdy
Atyraýǵa Izraıl Respýblıkasynan bir top dáriger keldi. Sheteldik professorlar Vadım Kapýller men Saıd Ibragım oblystyq balalar aýrýhanasynda, Rafael Mıller, Maksım Sokolov pen Lev Gýrevıch oblystyq onkologııa dıspanserinde jergilikti mamandarǵa sheberlik saǵatyn ótkizip jatyr.
Izraıl dárigerleri 31 mamyr-5 maýsym aralyǵynda atyraýlyq áriptesterimen birge naýqastarǵa ota jasaıdy. Sondaı-aq, turǵyndarǵa tegin keńes beredi.
Búgin oblys ákimi Serik Shápkenov Izraıl elinen kelgen dárigerler tobymen kezdesti.
«Adam balasy úshin birinshi baılyq – densaýlyq. Sondyqtan turǵyndar sapaly medıtsınalyq qyzmetke kedergisiz qol jetkizýi kerek. Osyǵan oraı jergilikti mamandardyń bilimin shyńdaý, salaǵa bilikti mamandardy tartý, zamanaýı tehnologııalarmen qamtamasyz etý sekildi jumystar jalǵasyn tabady. Izraıldik áriptesterimen josparlanǵan is-shara aıasynda atyraýlyq dárigerler qajetti aqparattar alyp, tájirıbe jınaıdy», -dedi Serik Shápkenov.
Oblys ákiminiń baspasóz qyzmetinen málim etkendeı, buǵan deıin 17-21 mamyr aralyǵynda ızraıldik professor Ilıa Rozın oblystyq perınataldyq ortalyqta semınar ótkizgen. Oǵan Atyraý qalasy men aýdandardan 40 maman qatysyp, onyń 34-i sertıfıkat alǵan. Al, bul joly 1 myńǵa jýyq medıtsına qyzmetkerin oqytý josparlanyp otyr.
Eske sala ketelik, budan buryn Atyraýda elordalyq dárigerler 5 balaǵa ota jasap, 300-ge jýyq keńes bergenin jazǵan bolatynbyz.
