Izraıl bitimge kelmese, Ulybrıtanııa Palestına memleketiniń táýelsizdigin moıyndaıdy
ASTANA. KAZINFORM — Ulybrıtanııa premer-mınıstri Kır Starmer eger Izraıl Gaza sektoryndaǵy atysty toqtatýǵa jáne uzaqmerzimdi beıbitshilikke baǵyttalǵan naqty qadamdarǵa barmasa, qyrkúıek aıynda Palestına memleketiniń táýelsizdigin moıyndaıtynyn málimdedi, dep jazady euronews.
Bul týraly ol seısenbi kúni jazǵy mezgil úshin sırek shaqyrylatyn úkimet otyrysynda aıtty. Jıyn Gaza sektoryndaǵy jaǵdaıdy talqylaýǵa arnaldy.
— Eger Izraıl úkimeti Gazadaǵy aýyr jaǵdaıdy toqtatýǵa baǵyttalǵan naqty qadamdarǵa barmasa, atysty toqtatpasa, Batys jaǵalaýdy anneksııalamaıtynyn ashyq málimdemese jáne eki memleket negizindegi sheshimge ákeletin uzaqmerzimdi beıbit protsesti qolǵa almasa, Ulybrıtanııa BUU Bas Assambleıasyna deıin Palestınany táýelsiz memleket retinde moıyndaıdy, — dedi Starmer mınıstrler kabınetiniń múshelerine.
Gaza sektoryndaǵy jaǵdaı 21 aıǵa sozylǵan soǵystyń saldarynan Izraıldiń áreketterine halyqaralyq synnyń kúsheıýine sebep boldy. Ásirese, ashtyq qaýpi jaıly eskertýler men álsiregen palestınalyq balalardyń sýretteri tarap, álemdik qaýymdastyqtyń alańdaýshylyǵyn týǵyzdy.
Buǵan deıin Frantsııa Palestınany memleket retinde resmı tanýǵa sheshim qabyldady. Biraq Amerıka Qurama Shtattary Frantsııanyń Palestınany memleket retinde taný týraly sheshimin qoldamady.
Sonymen qatar Nıderland alǵash ret Izraıldi ulttyq qaýipsizdikke qater tóndiretin el dep tanydy.