Izraıl bitimge qaramastan Lıvannyń ońtústigine áýe soqqylaryn jasady
ASTANA. KAZINFORM – Izraıl armııasy qoldanystaǵy bitim rejımine qaramastan Lıvannyń ońtústigine kezekti áýe shabýyldaryn jasady, dep habarlaıdy Anadolu.
Málimetke sáıkes, TsAHAL Lıvannyń ońtústigindegi «Hezbolla» ınfraqurylym nysandaryna jappaı soqqy bergen.
Al NNA agenttiginiń habarlaýynsha, Izraıl áskeri En-Nabatııa provıntsııasyndaǵy birneshe eldi mekenge shabýyl jasaǵan. Atap aıtqanda, ıAhmar ash-Shakıf, Kefr-Tebnıt, Ernýn, Kevserııe jáne Mervanııe eldi mekenderi áýe soqqysyna ushyraǵan.
Izraıl armııasy atalǵan aýyldarǵa aparatyn keıbir joldardy da nysanaǵa alǵan. Sonymen qatar Babılııe men Gassanıe eldi mekenderine de áýeden soqqy jasalǵan.
Budan bólek, Izraıldiń ushqyshsyz apparattary Sýr qalasy men oǵan jaqyn ornalasqan aýdandar ústinde tómen bıiktikte ushqan.
Buǵan deıin AQSh-tyń araǵaıyndyǵymen Izraıl men Lıvan arasyndaǵy bitim merzimi 16 sáýirden keıin uzartylǵany habarlanǵan edi.
Sondaı-aq 14 mamyrda Vashıngtonda Izraıl men Lıvan arasyndaǵy tikeleı kelissózderdiń úshinshi kezeńi ótken.
Kelissózder barysynda taraptar atysty toqtatý rejımin, Lıvannyń ońtústigindegi jaǵdaıdy jáne «Hezbollany» qarýsyzdandyrý máselesin talqylaǵan.
Aıta keteıik, kelissózder bitim rejıminiń merzimi aıaqtalýǵa jaqyn qalǵan jáne Lıvannyń ońtústiginde áskerı is-qımyldar jalǵasqan jaǵdaıda ótti.
