Izraıl bıligi Batys jaǵalaýda jańa qonystar salýǵa ruqsat berdi

ASTANA. KAZINFORM — Izraıl bıligi jeksenbi kúni Iordan ózeniniń okkýpatsııalanǵan Batys jaǵalaýynda 19 jańa zańsyz qonys qurýdy maquldaǵanyn málimdedi, dep habarlaıdy Anadolu Ajansı.

Haaretz gazetiniń málimetinshe, bul sheshim Izraıldiń Qaýipsizdik kabıneti otyrysynda qabyldanǵan.

Joba qarjy mınıstri Betsalel Smotrıch pen qorǵanys mınıstri Israel Kats tarapynan usynylǵan.

Basylym dereginshe, 2023 jylǵy 7 qazannan beri Izraıldiń Gaza sektorynda jáne Batys jaǵalaýda zańsyz qonystar salý qarqyny kúsheıip, bul aýmaqtaǵy ızraıldik qatysýdy keńeıtý jónindegi málimdemeler jıilegen. Qazirgi tańda Batys jaǵalaýda 365 zańsyz qonys bar.

Batys jaǵalaýdaǵy alǵashqy qonys — aımaqtyń ońtústiginde ornalasqan «Kfar Etsıon» 1967 jyly Izraıl Batys jaǵalaý men Shyǵys Ierýsalımdi okkýpatsııalaǵannan keıin birden qurylǵan. Keıin bul óńirde júzdegen qonys salyndy.

Izraıldegi úkimettik emes Peace Now uıymynyń deregine sáıkes, 2024 jyly (Shyǵys Ierýsalımdi eseptemegende) okkýpatsııalanǵan Batys jaǵalaýda shamamen 3 mln palestınalyq turady. Al ızraıldik qonystanýshylar sany 500 myń adamnan asyp ketken.

Úkimet 11 jeltoqsanda maquldaǵan 19 qonystan bólek, palestınalyq jerlerde 141 zańsyz qonys jáne 224 ruqsatsyz qonys bar.

Osylaısha, Iordan ózeniniń Batys jaǵalaýyndaǵy zańsyz qonystardyń jalpy sany 365-ke jetip otyr.

Aıta keteıik, Izraıl deldaldardyń bitimgerlik kúsh-jigeri aıasynda Gaza sektoryna soqqy jasady.