Izraıl Beırýttiń ońtústigindegi aımaqqa soqqy jasady

ASTANA. KAZINFORM – Izraıl áskerıleriniń málimdeýinshe, olar Beırýttiń ońtústik shetindegi aımaqqa soqqy berip, «Hezbolla» sodyryn nysanaǵa alǵan, dep habarlaıdy VVS. 

- Soqqy nysanasy jaqynda HAMAS sodyrlaryn basqaryp, olarǵa Izraıldiń beıbit turǵyndaryna qarsy aýqymdy jáne jaqyn arada bolatyn lańkestik áreketti josparlaýǵa kómektesken «Hezbolla» lańkesi boldy, - delingen Izraıl qorǵanys armııasy men Shın-Bet qaýipsizdik qyzmetiniń birlesken málimdemesinde.

Áskerılerdiń málimdeýinshe, olar «Hezbollanyń» tiregi sanalatyn Dahııa aýdanynda sodyrdy joıý úshin sharalar qoldanyp, qaýip-qaterdi joıǵan.

Reuters agenttiginiń kýágerlerge silteme jasap habarlaýynsha, áskerı ushaqtar Lıvan astanasynyń ústimen ushty jáne qalada kúshti jarylystardyń dybystary estilgen.

Ótken aptada Izraıl áskerıleri qarasha aıynda atysty toqtatý kelisimi kúshine engennen beri alǵash ret Beırýttyń ońtústigine soqqy berdi. Izraıl buǵan deıin Lıvan aýmaǵynan eki zymyran atylǵanyn málimdep, «Hezbollany» atysty toqtatý kelisimin buzdy dep aıyptady.

«Hezbolla» jetekshisi Naım Kasem áýe shabýyldaryn qaıta bastaýdy aıyptady. Top ókilderi sondaı-aq Izraıl aýmaǵyn atqylaýǵa qatysy baryn joqqa shyǵardy.

Eske sala ketsek, Izraıl kelisim aıasynda Lıvannan barlyq derlik áskerin shyǵardy, biraq bes pozıtsııada qaldyrdy. Lıvan muny okkýpatsııa dep atady.