Izraıl Beırýtte turǵyn úıdi jermen jeksen etti

ASTANA. KAZINFORM - Sársenbi kúni tań ata Izraıldiń áýeden jasaǵan soqqysy saldarynan Beırýttyń Bashýra aýdanyndaǵy turǵyn úıdiń kúl-talqany shyqty, dep jazady Euronews.

Lıvan bıliginiń málimetinshe, oqıǵa saldarynan keminde alty adam qaza tapty.

Soqqy 18 naýryz kúni tań ata jasaldy. Beırýttyń ortalyq aýdandarynda qoıý tútin kóterilip, oqıǵa ornyna jedel qyzmetter jetti. Izraıl áskeri shabýyldan shamamen bir saǵat buryn turǵyndarǵa evakýatsııa qajettigi týraly eskertý jasaǵanyn habarlady. Sonyń saldarynan ǵımarat tolyqtaı jermen-jeksen bolyp, qarbalas magıstraldegi kólikter de zaqymdandy.

Bul ǵımarat 12 naýryzda úsh ret atqylanǵan, alaıda sol kezde qulamaǵan. Búgingi soqqy bir aptaǵa jetpeıtin ýaqyt ishindegi tórtinshi ret jasalǵan shabýyl bolyp otyr.

Izraıl tarapynyń málimdeýinshe, nysan «Hezbolla» tarapynan iri kólemdegi qarajat saqtaý úshin paıdalanylǵan, biraq bul týraly naqty dálelder áli usynylǵan joq.

Soqqy Izraıldiń Lıvannyń ońtústiginde operatsııany kúsheıtýi aıasynda jasaldy. Bul — shekara mańyndaǵy aımaqtardan jasalǵan atqylaýlarǵa jaýap retinde túsindiriledi. Buǵan deıin sırek bolatyn Beırýttyń ortalyq aýdandaryna jasalǵan soqqylar sońǵy ýaqytta jıilep, beıbit turǵyndar qaýipsizdigine jáne qaqtyǵystyń odan ári ýshyǵý yqtımaldyǵyna alańdaýshylyq kúsheıtip otyr.

Aıta keteıik, osyǵan deıin BUU Izraıldiń Lıvanǵa jasaǵan keıbir soqqylary áskerı qylmys bolýy múmkin ekenin aıtqan bolatyn.