Izraıl Beırýttegi qonaqúıge soqqy jasady

ASTANA. KAZINFORM - Izraıl áskeri Beırýt qalasynyń ortalyǵyndaǵy Ramada Beirut Downtown qonaqúıi ornalasqan ǵımaratqa soqqy jasap, saldarynan keminde tórt adam qaza tapty. Bul týraly BBC habarlaıdy.

Basylymnyń málimetinshe, Izraıl shabýyl nysanasy Lıvan astanasynda áreket etken ırandyq qolbasshylar bolǵanyn aıtqan.

— Bul soqqy ótken aptada Izraıl men Hezbolla qozǵalysy arasyndaǵy qaqtyǵystar qaıta bastalǵaly beri Beırýttyń dál ortalyǵyna jasalǵan alǵashqy shabýyl boldy. Sondaı-aq Beırýttegi Raýshe aýdanynda bolǵan soqqy saldarynan taǵy on adam jaraqat aldy, — delingen Lıvannyń densaýlyq saqtaý mınıstrligi taratqan málimdemede.

Izraıl tarapy operatsııanyń nysanasy Islam revolıýtsııasy saqshylar korpýsynyń elıtaly «Qudys» bólimshesiniń negizgi qolbasshylary bolǵanyn málimdedi. Alaıda olardyń esimderi jarııalanǵan joq.

Basylymnyń jazýynsha, atalǵan qonaqúıde Lıvannyń ońtústigi men Beırýttyń ońtústik mańyndaǵy soǵys saldarynan úılerin tastap ketken turǵyndar ýaqytsha ornalasqan. Áýe soqqylary qaıtalanýy múmkin degen qaýippen olardyń bir bóligi ǵımarattan shyǵyp ketken.

Buǵan deıin Izraıl Beırýtta Hezbolla qozǵalysyna tıesili on nysanǵa soqqy jasaǵany habarlanǵan edi.