Izraıl Ben-Gýrıon áýejaıyndaǵy ushaqtaryn evakýatsııalaı bastady
ASTANA. KAZINFORM – Izraıldiń ulttyq áýe tasymaldaýshysy El Al Tel-Avıvtegi Ben-Gýrıon halyqaralyq áýejaıynan óz ushaqtaryn evakýatsııalaı bastady. Bul týraly Anadoly agenttigine Izraıl áýejaılar basqarmasynyń ókili Lıza Drır habarlady.
Bul sheshim Izraıldiń Iranǵa jasaǵan shabýylyna qarymta qaıtarýyna baılanysty qabyldanǵan.
Drırdiń aıtýynsha, ushaqtar shetelge evakýatsııalanǵan, biraq naqty qaı elge jiberilgeni kórsetilmegen.
Buǵan deıin Izraıl armııasy Iranǵa qarsy aýqymdy shabýyl jasaǵanyn málimdegen bolatyn. Izraıl Qorǵanys armııasynyń (TsAHAL) baspasóz qyzmetiniń deregi boıynsha, bul operatsııaǵa Izraıl ÁÁK-niń 200 ushaǵy qatysqan. Jaýap retinde Iran Izraılge qaraı 100 dron jibergen.
13 maýsym kúni tańerteń Izraıl armııasy Iran astanasy Tegeranǵa, sondaı-aq Tebrız, Lýrestan jáne Kermanshah qalalaryna, sonymen qatar Isfahandaǵy Natanz ıadrolyq nysanyna soqqy jasaǵan.
Shabýyl kesirinen Iran Qarýly kúshteriniń Bas shtabynyń bastyǵy general-maıor Mohammad Bagerı, Islam revolıýtsııasy saqshylar korpýsynyń (KSIR) qolbasshysy general-maıor Hosseın Salamı, sondaı-aq 6 ıadrolyq ǵalym qaza tapqany aıtyldy.
Habarlamaǵa sáıkes, Tegeranǵa jasalǵan shabýyl kezinde beıbit turǵyndar arasynda da kóptegen qurbandar bar.
Eske sala keteıik, Izraıl Iranǵa soqqy berip, áýe keńistigin jaýyp tastady.
Osy jaǵdaıǵa baılanysty Tel-Avıvtegi QR elshiligi Izraıldegi Qazaqstan azamattaryna úndeý jasady.
Air Astana toby Iran men Irak áýe keńistiginiń jabylýyna baılanysty keıbir Air Astana jáne FlyArystan turaqty jáne charterlik reısteriniń baǵytyndaǵy ózgerister týraly jolaýshylardy habardar etti.
Izraıldiń Iranǵa jasaǵan soqqysynan keıin munaı baǵasy kúrt kóterildi.
Búgin Iran Izraılge jaýap retinde 100-den astam dron jiberdi.