Izraıl «Baıron» daýylyna daıyndalyp jatyr
ASTANA. KAZINFORM – Izraıl bıligi Jerorta teńizinen kele jatqan «Baıron» daýylyna baılanysty el boıynsha joǵary daıyndyq rejimin engizdi. Daýyl buryn Gretsııa men Kıprge soqqy berip, aldaǵy táýlikterde Izraıl aýmaǵynda eń kúshti fazasyna jetedi.
Sınoptıkterdiń boljamynsha, daýyl, saǵatyna 90 km-ge deıin jetetin jel ekpini, sondaı-aq jergilikti sý tasqynynyń joǵary qaýpi kútiledi. Jaǵalaý aımaqtarynda birneshe saǵat ishinde 60-100 mm jaýyn-shashyn túskeni tirkelgen. Bılik ókilderi qubyr júıesi mundaı kólemdegi sýǵa tótep bere almaýy múmkin ekenin eskertip otyr. Bul qalalar men avtojoldarda sý basý qaýpin arttyrady.
Izraıl Qorǵanys armııasynyń Tyl qyzmeti qutqarý bólimshelerin joǵary daıyndyqqa kóshirip, aýa raıy kúrt nasharlamaı turyp ońtústiktegi shalǵaı bazalardaǵy áskerılerdi merziminen buryn úılerine jiberdi.
Mýnıtsıpalıtetter shuǵyl brıgadalardyń sanyn kúsheıtip, aryqtardy tazalaý jumystaryn júrgizýde jáne buryn sý basqan aımaqtarǵa sý sorǵysh qondyrǵylar daıyndap qoıǵan. Turǵyndarǵa sýǵa tolǵan jerlerge barmaý, jerasty parkıngine lıftpen túspeý, daýyldyń sharyqtaý sátinde úıden shyqpaý sharalaryn usyndy.
Densaýlyq saqtaý mınıstrligi de sýyqtan saqtaný jóninde nusqaýlyq taratyp, ásirese qarttar men balalarǵa erekshe kóńil bólýge shaqyrdy. Úı ishindegi temperatýrany turaqty ustap, jyly taǵam men sýsyn ishý, jalǵyz turatyn kórshilerdiń jaǵdaıyn tekserý usynylady.
Aýa raıynyń nasharlaýy halyqaralyq baılanysqa da áser etti. Izraıl, Kıpr jáne Gretsııa bes adam otyrǵan, onyń tórteýi Izraıl azamaty, joǵalǵan ıahtany izdeý operatsııasyn júrgizip jatyr. Keme Kıpr mańynda baılanyssyz qalǵan. Daýyl izdestirý jumystaryn qıyndatýda.
Izraıl áýejaılary reıster kestesinde yqtımal ózgerister bolýy múmkin ekenin eskertti. Buǵan deıin bir jolaýshylar ushaǵy aýa raıynyń qolaısyzdyǵyna baılanysty baǵytyn ózgertýge májbúr bolǵan.
«Baıron» daýyly aımaqtyq meteorologııalyq júıeniń resmı ataýyna ıe bolǵan jáne bıylǵy maýsymdaǵy Jerorta teńiziniń shyǵys bóligindegi eń aýqymdy tsıklondardyń biri dep baǵalanyp otyr. Izraıl bıligi daýyldyń shyńy beısenbi kúni bolady dep kútýde, sodan keıin aýa raıy birtindep turaqtana bastaıdy.
Gaza sektorynyń aqparattyq bıýrosy daýyl saldary ýaqytsha shatyrlarda turyp jatqan júzdegen myń palestınalyq otbasynyń jaǵdaıyn odan ári qıyndatýy múmkin ekenin málimdedi.
Aıta keteıik, Iran bıligi qurǵaqshylyq jaǵdaıynda jańbyrdy jasandy túrde jaýdyra bastady.