Izraıl Batys jaǵalaýdaǵy zańsyz 126 turǵyn úı qurylysyna ruqsat berdi
ASTANA. KAZINFORM — Izraıl Djenın aýdanynyń soltústigindegi okkýpatsııalanǵan Batys jaǵalaýda ornalasqan palestın jerlerindegi zańsyz «Sanýr» qonysynda 126 jańa turǵyn úı salý josparyn maquldady, dep jazady Anadoly.
12-Izraıl telearnasynyń habarlaýynsha, buryn 2005 jyly evakýatsııalanǵan «Sanýr» qonysynda 126 turaqty turǵyn úı salý jospary bekitilgen.
Izraıl qarjy mınıstri Betsalel Smotrıch bul sheshimdi quptap, ony «jaýlarǵa joldanǵan habar» dep atady.
Batys jaǵalaýdaǵy ızraıldik qonystanýshylar ókili Iosı Dagan da bul sheshimge qoldaý bildirip, «Sanýr qaıta qalpyna keltirilip, 126 úı salynady, bolashaqta bul aýdan qalaǵa aınalady» dedi.
Sonymen qatar Izraıldiń solshyl-ortalyq baǵyttaǵy «Peace Now» («Shalom ahshav») úkimettik emes uıymy óz málimdemesinde «Sanýrǵa» qaıta oralý 2005 jylǵy «ajyratý josparyna» qatysty qazirgi Izraıl úkimeti engizgen zańnamalyq ózgeristerdiń nátıjesinde múmkin bolǵanyn atap ótti. Bul ózgerister Batys jaǵalaýdyń soltústiginde eldi mekenderdiń bolýyna qoıylǵan shekteýlerdi alyp tastaýǵa jol ashqan.
Uıymnyń aıtýynsha, Izraıldiń qaýipsizdik kabıneti birneshe kún buryn bul qonysty qalpyna keltirý týraly sheshim qabyldaǵan.
Sondaı-aq uıym «Sanýrdy» qaıta josparlaý men bekitý úderisiniń óte jyldam júrip jatqanyn atap ótti.
Izraıl 2005 jyly Arıel Sharon úkimeti kezinde «ajyratý jospary» aıasynda Batys jaǵalaýdaǵy jáne Gaza sektoryndaǵy birqatar eldi mekenderden áskerin jáne qonystanýshylaryn shyǵarǵan bolatyn.
Al 2022 jyldyń jeltoqsanynda bılikke kelgen Bınıamın Netanıahý úkimeti Shyǵys Ierýsalım men Batys jaǵalaýda qonystaný saıasatyn kúsheıtken.
BUU bul aýmaqtardy okkýpatsııalanǵan palestın jerleri dep sanaıdy.
Budan buryn Izraıldiń birneshe qalasynda Netanıahý úkimetiniń ketýin talap etken mıtıng ótkeni anyqtaldy.
