Izraıl Batys jaǵalaýda palestınalyqtardyń 26 ǵımaratyn súrýge kiristi
ASTANA. KAZINFORM – Izraıldiń Qarjy mınıstri, ásire ońshyl saıasatker Betsalel Smotrıch okkýpatsııalanǵan Batys jaǵalaýdyń soltústigindegi Djenın qalasynda palestınalyqtarǵa tıesili 26 ǵımaratty buzý jumystary bastalǵanyn málimdedi, dep habarlaıdy Anadolý.
Smotrıch bul ǵımarattardy «zańsyz» dep atap, áleýmettik jelide olardy buzý jumystarynyń sýretterin jarııalady.
Ol amerıkalyq X kompanııasyna tıesili áleýmettik jelidegi málimdemesinde jumystar 2005 jyly evakýatsııalanǵan «Ganım» jáne «Kadım» qonystaryn qalpyna keltirýge daıyndyq aıasynda tańerteń bastalǵanyn habarlady.
Buǵan deıin Izraıldiń Qaýipsizdik kabıneti Smotrıch pen Qorǵanys mınıstri Israel Kats usynǵan basyp alynǵan Palestına aýmaqtarynda 19 jańa qonys qurý josparyn maquldaǵan.
Jospar Batys jaǵalaýda 11 jańa qonys salýdy, «Ganım» men «Kadımdi» qalpyna keltirýdi, sondaı-aq Izraıl zańnamasy boıynsha zańsyz sanalatyn alty qonysty zańdastyrýdy kózdeıdi.
Batys jaǵalaýda 365 ızraıldik qonys bar
Izraıldiń Peace Now quqyq qorǵaý uıymynyń 2024 jylǵy málimetinshe, Shyǵys Ierýsalımdi eseptemegende, okkýpatsııalanǵan Batys jaǵalaýda shamamen 3 mln palestınalyq jáne 500 myńnan astam ızraıldik turady.
Izraıl úkimeti 11 jeltoqsanda maquldaǵan 19 qonystan bólek, basyp alynǵan Palestına aýmaqtarynda 141 ızraıldik qonys jáne ásire ońshyl evreı toptary qurǵan 224 forpost ornalasqan. Sońǵylary Izraıl zańnamasy boıynsha da zańsyz sanalady.
Osylaısha, okkýpatsııalanǵan Batys jaǵalaýdaǵy ızraıldik qonystar men forposttardyń jalpy sany 365-ke jetedi.
Izraıl úkimeti ásire ońshyl evreı toptary qurǵan jáne el zańnamasy boıynsha zańsyz sanalatyn qonystardy birjaqty túrde zańdastyrý týraly buǵan deıin de birneshe ret sheshim qabyldaǵan.
Halyqaralyq quqyq boıynsha Izraıldiń okkýpatsııalanǵan aýmaqtarda qonystar salýy jáne ol jerlerge óz azamattaryn kóshirýi zańsyz sanalady.
Aıta keteıik, buǵan deıin Gazada qıraǵan ǵımarat astynan eki áýlettiń 99 múshesiniń máıiti shyǵarylǵan edi.
