Izraıl barlaý qyzmetiniń basshysy Netanıahýmen kelispeýshilikten keıin otstavkaǵa ketti
ASTANA. KAZINFORM — Izraıldiń ishki barlaý qyzmetiniń basshysy otstavkaǵa ketetinin málimdedi. Bul sheshim 2023 jylǵy 7 qazanda HAMAS toby uıymdastyrǵan qandy shabýyl týraly agenttiktiń aldyn ala eskertý jasaı almaǵanyna baılanysty qabyldanǵan, dep habarlaıdy Euronews.com.
Izraıldiń ishki barlaý qyzmeti Shın-Bet basshysy Ronen Bar 15 maýsymda otstavkaǵa ketetinin málimdedi. Bul sheshim onyń premer-mınıstr Bınıamın Netanıahýmen aradaǵy kelispeýshilikterden keıin qabyldandy. Ótken aıda Netanıahý ony qyzmetinen bosatýǵa tyrysqan bolatyn.
Bar bul týraly dúısenbi kúni Shın-Bet qyzmetkerleriniń qurmetine arnalǵan eske alý is-sharasynda aıtty.
— Kóptegen jyldar boıy túrli maıdandarda qyzmet atqaryp kelemin. Bir túni, ońtústik maıdanda, aspan tóbemizden qulady, — dedi ol 2023 jylǵy 7 qazandaǵy lańkestik áreketti eske ala otyryp. Bul shabýyl Izraıldiń ońtústiginde 1200-den astam adamnyń ómirin qıdy jáne Gaza sektorynda HAMAS-pen soǵystyń bastalýyna sebep boldy. — Barlyq júıe isten shyqty. Shın-Bet te aldyn ala eskertý jasaı almady. Shabýyldy toqtata almaǵan barlyq tarap qaza tapqandar, jaralanǵandar, urlanǵandar men olardyń otbasylarynyń aldynda bas ıip, tıisti jaýapkershilik alýy tıis, — dedi Bar.
Ótken aıda Netanıahý HAMAS shabýylyna baılanysty senim daǵdarysy týyndaǵanyn aıtyp, Bardy ornynan almaq boldy. Alaıda bul áreket el ishinde úlken narazylyq týdyrdy. Sebebi dál sol ýaqytta Shın-Bet premer-mınıstr keńsesiniń Katarmen baılanystaryn tekserip jatqan edi. Katar — HAMAS pen Izraıl arasyndaǵy deldal memleket.
Shın-Bet Netanıahýdyń jaqyn keńesshileriniń Katardyń aqyly keńesshileri retinde qyzmet etip júrip, bir mezgilde premer-mınıstr keńsesinde jumys istegeni týraly aıyptaýlardy zerttep jatyr. Bul rette Netanıahýdyń ózi tergeýge tikeleı tartylǵan joq.
Izraıl Joǵarǵy soty Bardy qyzmetinen bosatý týraly sheshimdi ýaqytsha toqtatty. Sot taraptardy ymyraǵa kelýge shaqyrdy.
Bar dúısenbidegi sózinde «Bul sot isi meniń jeke máselem emes, bolashaq Shın-Bet basshylarynyń táýelsizdigine qatysty» ekenin aıtty.
Ótken aptada Bar Joǵarǵy sotqa Netanıahýdy Shın-Bet bıligin saıası jáne jeke múddege paıdalanýǵa tyrysty dep aıyptaǵan qujat usyndy.
Netanıahý buǵan deıin birneshe ret «tereń memleket» — ıaǵnı memlekettik qyzmetkerler men saılanbaıtyn sýdıalar ony bılikten taıdyrýǵa tyrysyp otyr dep málimdegen. Qoǵamdyq uıymdar Shın-Bet basshysy táýelsiz tulǵa bolýy tıis ekenin aıtyp, Bardyń ketýi premer-mınıstrdiń bul qyzmetke óz odaqtasyn taǵaıyndaýyna jol ashady dep qaýiptenip otyr.
Shın-Bet palestınalyq qarýly toptardy baqylaýǵa jaýapty organ. Bar HAMAS shabýylyna jol berilgenin buǵan deıin ózi de moıyndaǵan.
Netanıahý qaýipsizdik qurylymdary men armııany aıyptap, resmı tergeý komıssııasyn qurý týraly usynystarǵa qarsy shyqqan bolatyn.
Bar — HAMAS shabýylynan keıin otstavkaǵa ketken nemese qyzmetinen bosatylǵan birneshe joǵary laýazymdy qaýipsizdik qyzmeti ókilderiniń biri. Olardyń qatarynda burynǵy qorǵanys mınıstri men armııa basshysy da bar.
Osy aıda Netanıahý Shın-Bet basshysy retinde burynǵy Áskerı-teńiz kúshteriniń qolbasshysyn taǵaıyndaǵan edi. Alaıda bul kandıdattyń antıúkimettik narazylyqtarǵa qatysqany belgili bolǵan soń, taǵaıyndaý 24 saǵat ótpeı kúshin joıdy.
Aıta ketelik Netanıahý Gazadaǵy 10 ızraıldik tutqyndy bosatýǵa nıetti ekenin jazǵan edik.