Izraıl BAÁ-degi qaýip-qater týraly eskertip, elshilik qyzmetkerlerin shyǵara bastady
ASTANA. KAZINFORM — Shabýyl qaýpiniń kúsheıýine baılanysty evakýatsııa Ábý-Dabıdegi elshilik qyzmetkerleriniń kópshiligine áser etedi, dep habarlaıdy Kazinform menshikti tilshisi.
Izraıldiń Ulttyq qaýipsizdik keńesi (UQK) Birikken Arab Ámirlikterine qazirgi sapar týraly eskertýin kúsheıtip, sonyń ishinde Iranmen baılanysy bar lańkestik toptardyń ızraıldikterge shabýyl jasaý yqtımaldyǵy joǵary ekenin eskertti.
UQK beısenbi kúni jasaǵan málimdemesinde qaýip-qaterdiń artýy Izraıldiń Iran men Gaza sektoryndaǵy sońǵy áskerı operatsııalarynan keıin shabýylǵa degen motıvatsııanyń artýy, sondaı-aq aımaqtaǵy Palestınany jaqtaıtyn kóńil-kúıdiń kúsheıýimen baılanysty ekeni aıtylǵan.
Jańartylǵan keńeske sáıkes, Izraıl BAÁ úshin «úshinshi deńgeı» eskertýin saqtaýdy jalǵastyryp otyr. Onda adamdardy mańyzdy emes saıahattardan aýlaq bolýǵa jáne elge saıahat josparlaryn baıypty túrde qaıta qaraýǵa shaqyrady.
UQK aıtýynsha, evreı merekeleri men Shabbat kezinde Ámirlikterdegi ızraıldik jáne evreı nysandaryna erekshe qaýip bar.
— HAMAS, «Hezbolla» jáne ırandyq proksıdi qosa alǵanda uıymdardyń belsendilik belgileriniń ósýi jaǵdaıynda aımaqta ızraıldikterge qarsy shabýyl jasaý qaýpi bar, — delingen málimdemede.
Sonymen birge Ábý-Dabıdegi Izraıl elshiligin jartylaı evakýatsııalaý týraly sheshim qabyldandy. Qyzmetkerlerdiń kópshiligi dıplomatııalyq mıssııany tastaıdy, al qalǵandary kúsheıtilgen qaýipsizdik sharalarymen jumys isteıtin bolady.
Izraıl bıliginiń atap ótýinshe, lańkestik uıymdar ótken tájirıbe kórsetkendeı kóbinese ızraıldikter turatyn jáne evreı uıymdary belsendi jumys isteıtin Izraılmen kórshiles elderdi nysanaǵa alyp júr.
Sońǵy jyldary Izraıl men BAÁ arasyndaǵy qarym-qatynastardy qalpyna keltirýdi kózdeıtin 2020 jyly Avraam kelisimine qol qoıylǵannan keıin ámirlik qoǵamyndaǵy ızraıldik jáne evreı qaýymdastyǵynyń kólemi men kórinýi aıtarlyqtaı ósti.
Alaıda 2023 jyldyń qarashasynda BAÁ-de lańkestik áreket dep tanylǵan Habad qozǵalysynyń ókili Zvı Kogannyń óltirilýi sııaqty oqıǵalar oqıǵalar aımaqtaǵy ızraıldikterdiń qaýipsizdigine nazar aýdartty.
2024 jyldyń kókteminde bul is boıynsha úsh aıyptalýshyny Ábý-Dabı apellıatsııalyq soty ólim jazasyna kesti.
Buǵan deıin habarlanǵandaı, Taıaý Shyǵystaǵy shıelenistiń aıasynda Iran men Izraıl 2025 jyldyń ekinshi toqsany qorytyndysy boıynsha kıbershabýyldar sany eń kóp elder bestigine endi.