Izraıl avıatsııasy Gazadaǵy HAMAS keshenine soqqy berdi
AMMAN. QazAqparat - Demalys kúnderi Palestına anklavynan jasalǵan zymyrandyq shabýyldarǵa jaýap retinde Izraıl dúısenbi kúni Gazaǵa áýe shabýyldaryn bastady, dep habarlaıdy QazAqparat tilshisi Izraıl qorǵanys kúshterine silteme jasap.
Izraıldiń áýe shabýyly senbi kúni Gaza sektorynan ızraıldik eldi mekenderge zymyran ushyrýyna jaýap boldy.
«Senbi kúni Gaza sektorynan Izraılge zymyran ushyrýǵa jaýap retinde TsAHAL joıǵysh ushaqtary HAMAS lańkestik uıymyna tıesili zymyrandar jasaý úshin paıdalanylatyn shıkizaty bar jerasty nysanyna túnde shabýyl jasady», - delingen Izraıl qorǵanys kúshteriniń málimdemesinde.Izraıl áskerıleriniń habarlaýynsha, Gaza shekarasyna jaqyn eldi mekenderge jasalǵan áýe soqqylarynan keıin áýe shabýylynyń sırenalary estilgen. Sondaı-aq Izraıl áskerıleri barlyq jaýapkershilikti palestınalyq Hamas tobyna júktedi.
«TsAHAL HAMAS-ty Gazadan shyqqan barlyq lańkestik áreketterge jaýapty dep sanaıdy jáne ol Izraılge qarsy qaýipsizdikti buzýdyń saldarymen betpe-bet keledi», - dedi ızraıldik áskerıler.
Budan basqa, palestınalyq WAFA aqparat agenttiginiń habarlaýynsha, Izraıl artıllerııasy Gaza sektorynyń soltústigindegi Beıt-Hanýn qalasynyń batysyndaǵy bir nysanǵa jáne aýylsharýashylyq alqaptaryna úsh ret oq jaýdyryp, aıtarlyqtaı shyǵyn keltirgen. Sonymen birge Palestınanyń Qyzyl Jarty jarty aı uıymy Izraıl armııasynyń tań atar aldynda Iordan ózeniniń Batys jaǵalaýyndaǵy Nablýsta jasaǵan shabýylynda bir adamnyń qaza taýyp, jeti adamnyń jaralanǵanyn habarlady.
Izraıl qorǵanys kúshteri Nablýs reıdine qatysty ázirge túsinikteme bergen joq.
Búginde Palestına-Izraıl qaqtyǵysy taǵy da shıelenisip jatyr. Qaqtyǵys saldarynan jyl basynan beri 47 palestınalyq, onyń ishinde sodyrlar men beıbit turǵyn qaza tapty, dep habarlaıdy AFP.
Arsen Óteshev
Foto: Mahmud Hams/AFP
