Izraıl áýe soqqylary saldarynan Gaza sektorynda keminde 32 palestındik qaza tapty

ASTANA. KAZINFORM – Jergilikti bılik málimetinshe, senbi kúni Gaza sektory aýmaǵyna jasalǵan Izraıldiń áýe soqqylary saldarynan keminde 32 adam qaza tapty. Áýe shabýyldary Gaza sektorynyń búkil aýmaǵynda, sonyń ishinde Han-ıÝnıs qalasynda tirkelgeni habarlandy, dep jazdy VVS.

HAMAS baqylaýyndaǵy Gazadaǵy azamattyq qorǵanys basqarmasynyń habarlaýynsha, qaza tapqandardyń arasynda áıelder men balalar bar. Shabýyldardyń birinde Han-ıÝnıs qalasynda qonys aýdarǵan adamdar ornalasqan shatyrǵa áskerı tikushaqtardan oq atylǵan.

Palestınalyq tarap bul soqqylardy osy aıdyń basynda kúshine engen, AQSh prezıdenti Donald Tramptyń deldaldyǵymen ótken qazan aıynda jasalǵan bitim kelisiminiń ekinshi kezeńi bastalǵaly bergi eń aýqymdy shabýyldar dep atady.

Izraıl áskeri juma kúni HAMAS tarapynan kelisim talaptary buzylǵanyn alǵa tartyp, birqatar soqqylar jaýap retinde jasalǵanyn rastady.

Ótken jyldan beri kúshine engen ýaqytsha bitimnen beri Izraıl men HAMAS bir-birin kelisimdi buzdy dep ózara aıyptap keledi.

Izraıl qorǵanys armııasy málimdemesinde shyǵys Rafah aýdanynda «jer asty terrorıstik ınfraqurylymnan shyqqan 8 lańkes anyqtalǵany» aıtyldy. Bul aımaq qazan aıyndaǵy kelisimge sáıkes Izraıl kúshteri ornalastyrylǵan Gaza sektorynyń bir bóligi sanalady.

Izraıl áskeri Izraıl qaýipsizdik agenttigimen birlesip, birneshe nysanaǵa soqqy bergenin habarlady. Olardyń qatarynda «4 komandır men ózge de lańkester», qarý qoımasy, óndiristik nysan, sondaı-aq Gaza sektorynyń ortalyq bóliginde ornalasqan HAMAS-qa tıesili «2 ushyrý qondyrǵysy» bar.

Óz kezeginde HAMAS áýe soqqylaryn aıyptap, AQSh-ty shuǵyl áreket etýge shaqyrdy. Uıym málimdemesinde bul «úzdiksiz buzýshylyqtar» Izraıl úkimetiniń «Gaza sektoryna qarsy qatygez genotsıd soǵysyn jalǵastyryp otyrǵanyn» dáleldeıdi dep kórsetilgen.

Aıta keteıik, ıÝNISEF dereginshe, Gazada 90%-dan asa mektep zaqymdanǵan nemese qıraǵan.