Izraıl áýe kúshteri Irandaǵy zymyran ınfraqurylymyna soqqy berdi
ASTANA.KAZINFORM - Izraıl Iran nysandaryna birqatar áýe shabýylyn jalǵastyryp, qysymdy kúsheıtti, dep habarlaıdy Kazinform agenttiginiń menshikti tilshisi.
Izraıl áskerı-áýe kúshteri Kermanshah provıntsııasyndaǵy qoımalar men ushyrý alańdaryn, ballıstıkalyq zymyrandardy ushyrýǵa baılanysty ınfraqurylymdy joıǵanyn málimdep, Iran terrıtorııasyna kezekti soqqylar serııasyn jasady.
Izraıl qorǵanys kúshteriniń (TsAHAL) málimetinshe, operatsııaǵa 15-ten astam joıǵysh ushaq qatysqan. Soqqylar Irannyń áýe keńistiginen áýe ústemdigine qol jetkizýge baǵyttalǵan.
- TsAHAL maqsatyna jetý úshin shabýyldy kúsheıtýdi jalǵastyrady, - delingen Izraıl armııasynyń resmı málimdemesinde.
Sonymen birge Horremabad aımaǵynda Izraıldiń ushqyshsyz ushaǵy túsirilgeni rastaldy. Aldyn ala málimet boıynsha, bul barlaý mıssııalary úshin paıdalanylǵan Hermes modeli. TsAHAL qupııa aqparattyń taralý qaýpi joq dep sendirdi.
Dúısenbige qaraǵan túni Izraıl soqqylary Tegerannyń ońtústik-shyǵysyndaǵy áskerı keshen Parchın aımaǵynda jáne ýran baıytý qondyrǵylary óndiriletin Karadj qalasynda da tirkeldi. Eki jaǵdaıda da Irannyń áýe qorǵanys júıeleri iske qosyldy.
Buǵan qosa, Izraıl armııasy dúısenbige qaraǵan túni Irannan bir ballıstıkalyq zymyran ushyrylǵanyn habarlady. Al Tel-Avıv aımaǵynda sırenalar iske qosyldy. Qurbandar men qıraýlar tirkelgen joq.
Dúısenbi kúni tańerteń Iran Izraılge taǵy bir ballıstıkalyq zymyran ushyrdy. Sırenalar estilgen aýmaqtardaǵy beıbit turǵyndarǵa kelesi eskertýge deıin oryndarynda qalýǵa buıryq berildi.
Aıta keteıik, Taıaý Shyǵystaǵy qaqtyǵys áýe qatynasyna áser etip, reıster toqtatylyp jatyr.