Izraıl áýe kúshteri Damasktiń ońtústigine soqqy jasady
ASTANA. KAZINFORM – Seısenbi kúni keshke Izraıl áskerı ushaqtary Sırııa astanasynyń ońtústigindegi qalaǵa, sondaı-aq ońtústiktegi Daraa provıntsııasyna soqqy jasady.
Damaskten ońtústikke qaraı shamamen 20 shaqyrym jerde ornalasqan ál-Kısva qalasyna, Daraa provıntsııasyndaǵy Izraa qalasynyń shetine jáne Sırııanyń ońtústigindegi Kýneıtra provıntsııasyndaǵy nysandarǵa soqqy jasaldy, dep habarlaıdy Syria TV.
Izraıl áskeri Sırııanyń ońtústigindegi áskerı nysandarǵa, sonyń ishinde olardyń aıtýynsha qarý-jaraq saqtalǵan basqarý ortalyqtary men nysandarǵa soqqy bergenin rastady.
— Sırııanyń ońtústiginde áskerı kúshter men múlikterdiń bolýy Izraıldiń beıbit turǵyndaryna qaýip tóndirip otyr. TsAHAL ızraıldikterge tóngen kez kelgen qaterdi joıý úshin áreketin jalǵastyrady, - dep málimdedi TsAHAL.
Bombalaý Sırııa Izraıldiń óz terrıtorııasyna basyp kirýin aıyptap, Izraıldi áskerlerin shyǵarýǵa shaqyrǵannan keıin birneshe saǵat ótken soń boldy. Bul týraly Sırııanyń jańa bıleýshileri eldiń saıası bolashaǵyn anyqtaý úshin uıymdastyrǵan Ulttyq dıalog konferentsııasynyń qorytyndy málimdemesinde habarlandy.
— Áskeı-áýe kúshteri Sırııanyń ońtústiginde tynyshtyq ornatý úshin biz anyqtaǵan jańa saıasattyń bóligi retinde Sırııanyń ońtústigine kúshti soqqylar jasap jatyr jáne bizdiń habarymyz anyq: biz Sırııanyń ońtústiginiń Lıvannyń ońtústigine aınalýyna jol bermeımiz, - delingen Izraıl qorǵanys mınıstri Israel Katstyń málimdemesinde.
Ol sondaı-aq Sırııa bıligi men lańkestik uıymdardyń eldiń ońtústigindegi qaýipsizdik aımaǵynda bekinýge tyrysatyn kez kelgen áreketi otpen qarsy alynatynyn basa aıtty.
«Haııat Tahrır ash-Sham» (HTSh, Qazaqstanda tyıym salynǵan uıym — red.) bastaǵan kóterilisshiler jeltoqsanda burynǵy prezıdent Bashar Asadty taqtan taıdyrǵannan keıin Izraıl Sırııadaǵy BUU baqylaýyndaǵy qarýsyzdandyrylǵan aımaqqa áskerin jiberdi.
Izraıl premer-mınıstri Bınıamın Netanıahý jeksenbi kúni Izraıldiń Sırııanyń ońtústiginde HTSh-tyń nemese eldiń jańa bıligimen baılanysty kez kelgen basqa kúshterdiń bolýyna jol bermeıtinin aıtyp, aýmaqty qarýsyzdandyrýdy talap etti.